31/7-2010
Vest-Telemark Blad
Postboks 33
3836 Kviteseid
Tlf. 35 06 88 00
Faks 35 05 31 71
SMS/MMS: Kodeord VTB til 1963
E-postadresser:
redaksjon@vtb.no
annonse@vtb.no
Utgjevingar:
Tysdag, torsdag og laurdag
Saug til seg mineralvatngigant
 Richard Harris (t.v.), administrerande direktør for Coca-Cola i Noreg, og Bjørn Bunæs, eigar av Telemark Kildevann, skreiv under ei avtale som både sikrar og gjev nye arbeidsplassar i Fyresdal. |
Etter å ha prøvd i tri år for å få det amerikanske storkonsernet Coca-Cola på kroken, kunne Telemark Kildevann-eigar Bjørn Bunæs torsdag juble for å ha fått storfangst.
– Dette er utruleg, strålte Bunæs i det han signerte ein verdifull seksårs kontrakt der Coca-Cola nyttar kvalitetsvasskjelda den lokale brusfabrikken har i Fyresdal. Signeringa skjedde i Fyresdal, etter at to helikopter hadde landa med aktuelle partar som er involverte.
Telemark Kildevann skal, i tillegg til eigen produksjon, tappe vatn klart på flasker som blir eit Coca-Cola produkt både i Noreg og Sverige. Når den nye leveransen er innkøyrd i systemet neste år, kan Coca-Cola kome til å få 30 millionar flasker vatn årleg, ja kanskje meir, frå leverandøren i Fyresdal. Og det skjer i ei tid som vassmarknaden er i veldig vekst, i fylgje Bunæs.
Leita godt
Richard Harris, administrerande direktør for Coca-Cola i Noreg, fortel at det her til lands blei leita godt for å finne kven som kunne levere storkonsernet best vasskvalitet.
– Me har inngått kontrakt med Telemark Kildevann fordi me ynskjer å vere i vassbransjen. Me har leita etter det som gjev kjempegod smak, og vatnet i Fyresdal smakar fantastisk og har lågt saltinnhald. Bygda har perfekt naturareal for å finne godt vatn over tid. Her fann me betre vatn enn dei som har hatt det leiande vatnet i Noreg, smiler Harris.
– Herleg, seier Bunæs. Denne gongen snakkar han ikkje om Fyresdal-vatnet som han meiner er best i verda. Men han snakkar om kontrakten med Coca-Cola. Neste år kan avtala føre til at omsetnaden på Telemark Kildevann skvett nokre titals millionar kroner i vêret. Coca-Cola er einaste i Europa som får rettar til å selje vatn frå kjelda i Fyresdal.
30 arbeidsplassar
Kontrakten med Coca-Cola betyr triskiftsordning og åtte nye arbeidsplassar. Med totalt 30 arbeidsplassar er Telemark Kildevann største verksemda i Fyresdal, etter kommunen.
Sidan Bunæs byrja ein brusande karriere som eigar av brusfabrikken i Fyresdal, har han investert 60 millionar kroner i bygda.
– Eg er oppteken av at bedrifta kan fortsette, har tryggleik og eit godt fundament. Me har lagt stein for stein, og det kjem me til å halde på med. Og dei tilsette har gjort ein fantastisk innsats her, påpeikar Bunæs.
Elles avslører han at Telemark Kildevann og Coca-Cola vil opprette eit kulturfond i Telemark som skal gå til alt frå film til idrett.
Fyresdalordførar Saamund Gjersund meiner avtala mellom dei to partane gjev eit kjempespennande marknadspotensiale som kan bli stort, no som Coca-Cola har kome inn i vesle Fyresdal.
– Og det er spennande med meir fokus på reint vatn, som Fyresdal ynskjer å bli assosiert med. Tek avtala av, kan det fort bli snakk om utviding av Telemark Kildevann og fleire arbeidsplassar. Men fyrst og fremst er eg oppteken av at dagens arbeidsplassar er sikra, kommenterer Gjersund.
Artikkelen er publisert 06/05-2006
Aktuelle saker:
Fryktar farleg veg
Økologisk fleirbruksskog i årevis
Glade for å vere tilbake
Endeleg kunstgras
Eldsjeler «sprengjer» fram gruvesenter
Ikkje god nok karakter for grunnskule
Satsar på lokalt øl på fjellgard
Vil spore opp «Hans»
Dramatisk i Øyskogen