7/9-2010
Vest-Telemark Blad
Postboks 33
3836 Kviteseid
Tlf. 35 06 88 00
Faks 35 05 31 71
SMS/MMS: Kodeord VTB til 1963
E-postadresser:
redaksjon@vtb.no
annonse@vtb.no
Utgjevingar:
Tysdag, torsdag og laurdag
Endeleg kunstgras
 Glade entusiastar: – Me hadde aldri greidd dette utan den store dugnadsviljen, seier leiar i IL Rein, Oddbjørn Hyttedalen (t.h.). Med seg på dugnadslaget har han hatt maskinførar Gudmund Gardsteig. (Privat foto) |
727.000 av dei om lag 28 millionar kronene Telemark fylkeskommune delar ut i spelemidlar til anlegg for idrett og fysisk aktivitet i år, gjeng til IL Rein sitt kunstgrasbaneprosjekt. Pengane utgjer om lag ein tredel av totalkostnaden med banen.
– Anlegget er kostnadsberekna til om lag to millionar kroner. I tillegg til spelemidlane har kommunen støtta prosjektet med 700.000, og idrettslaget har gjeve 100.000. Resten er dugnadsinnsats, fortel leiar i IL Rein, Oddbjørn Hyttedalen.
Han er glad dei endeleg får oppfylt draumen om kunstgras i Edland. Dei har tatt litt under halvparten av grasbanen for å lage kunstgrasdelen.
– No får me utvida sesongen med i alle fall tri månader. Tidlegare har me ikkje kunna bruke banen før i slutten av mai, men no kan ein altså starte så fort kunstgrasbanen er måka. Om sommaren vil ein framleis bruke grasbanedelen, seier Hyttedalen.
Uvurderleg innsats
Han fortel at barn og unge i området er glade for at kunstgrasbanen snart er på plass.
– No har me ein bane me kan bruke nesten heile året. Om vinteren planlegg me å leggje is på han for å bruke til skøytebane. Etter kvart vil også ljosanlegg kome på plass, seier Hyttedalen.
Banen var også vurdert lagt andre stader, men dei er glade for at han no ligg i tilknyting til både den gamle banen og skulen.
– Det er viktig å få med at dette ikkje hadde vore mogleg å få til utan dugnadsinnsatsen til folk. Det har aldri vore noko problem å få folk til å stille opp. Me må dessutan framheve bidraget til maskinentreprenør Svein Tore Kåsa, som har lånt ut alt me har hatt bruk for av maskiner og utstyr. Når dei har hatt mindre å gjere under arbeidet med bygdevegen, har dei hjelpt oss her nede. Innsatsen har vore fantastisk, og utan dei hadde me aldri fått det til, seier ein takksam idrettslagsleiar.
Arbeidet har gått unna på rekordfart, og Hyttedalen reknar med at banen står ferdig i løpet av august. Dermed ligg alt til rette for lange fotballsesongar på Edland i framtida.
Artikkelen er publisert 29/07-2010
Aktuelle saker:
Aktiv helg
– Observatørrolla var eit spel for galleriet
– Tidenes mål på Åmot stadion
Sterke kulturkommunar
Omdømefokus i debatt om skulen
85.000 til vintermarknadsføring
Heskjeleg moro med hesjing
Presenterte framtidas sentrumsplan
Skieventyret selt til VTM for 1,8 millionar