7/9-2010
Vest-Telemark Blad
Postboks 33
3836 Kviteseid
Tlf. 35 06 88 00
Faks 35 05 31 71
SMS/MMS: Kodeord VTB til 1963
E-postadresser:
redaksjon@vtb.no
annonse@vtb.no
Utgjevingar:
Tysdag, torsdag og laurdag
Glade for å vere tilbake
 Tilbake: I kveld står Hellbillies igjen på scenen på Dyrskuplassen. (Pressefoto) |
I kveld samlar tett på 10.000 menneske seg på Fjoset for å få med seg at Hellbillies er tilbake på Countryfestivalen i Seljord. Vokalist Aslag Haugen gler seg til å møte festivalpublikumet att. Og det er mange ivrige fans som møter opp når hallingdølane står på scenen.
– Det hender at publikum kan songane betre enn meg. Etter konserten kan det kome folk bort å seie: «Du song feil i andre verset», fortel Haugen til VTB.
Plateaktuelle
Det har gått vel eitt år sidan den alvorlege fallulykka på den usikra scenen på Skippagurrafestivalen i Finnmark. Vokalist Aslag Haugen fall av scenen og brekte båe armane og nakken. Alle konsertar resten av året blei avlyst, medan Hellbillies-vokalisten kjempa kampen for å bli bra att. Det blei han.
– Eg har hatt griseflaks, uttala Haugen til lokalavisa Hallingdølen i september.
No er bandet tilbake for fullt. Sidan comebacket på Lillestrøm i juni har det gått slag i slag. Hallingdølane er meir populær enn nokon gong, 20 år og 12 album etter den spede starten. Den nye plata «Leite etter lykka» har fått strålande kritikkar og har toppa VG-lista dei siste seks vekene. Facebook-gruppa har no meir enn 40.000 medlemmer.
– Om ein kan seie at det kom noko godt ut av fjorårets ulykke, er det at me fekk god tid til å jobbe med den nye plata. For min eigen del var det også veldig bra å få ta ting i eige tempo, seier Haugen.
– Me er kjempeglade for responsen den nye plata har fått. Det er ikkje sjølvsagt, held han fram.
Ål og Seljord
Det går i eitt med konsertar i sommar og utover hausten. Men denne helga er kanskje den mest spesielle. I går var dei på heimebane på den årlege konserten i Folkeparken på Ål. I dag er dei tilbake på Countryfestivalen, for fyrste gong sidan 2007. Fjorårets festivalbesøk blei som kjent avlyst. Derfor set vokalist Haugen og dei andre bandmedlemmene stor pris på å vere tilbake i Seljord på Nordens største countryfestival.
– Me trivst veldig godt på Countryfestivalen. Det kjem jo vanvittig mykje folk og det er ei veldig stor oppleving. Lyden av allsong er fantastisk, seier Aslag Haugen.
– Kan du forklare korleis det er å stå på scenen når tusenvis syng med?
– Det er ei ubeskriveleg kjensle, og veldig sterkt å sjå at så mange kan songane, seier Haugen.
Tidleg populære i Telemark
Hallingdølane kosar seg i Telemark. I tillegg til Countryfestivalen skal dei også innom Treungenfestivalen til veka og Høvleriet i Gransherad i slutten av august. Sist helg var dei på Wrightegaarden i Langesund. Hellbillies er i dag populære over heile landet. For kring 20 år sidan var tanken å erobre heimtraktene, og Hellbillies var lite førebudd på kva som venta dei i nabofylket Telemark. På eit hotell i Rauland var det Hellbillies-feber i 1992. Folk strøymde på til konsertlokalet og reiv ned dører for å kome inn. Haugen hugsar det godt.
– Hotelldrivaren fekk panikk og rømde frå lokalet. Me gjennomførte konserten og alt gjekk bra, sjølv om det var vilt. Dagen etter var teppet på golvet som ei myr, minnest Haugen frå konserten i Rauland.
Den fyrste plata «Sylvspente boots» frå 1992 tok Noreg med storm. Songar som «Ho Birgjit Lien», «Rakafisk» og «Aksjon på Ål» blei landeplager. Sidan har det kome slager etter slager på hallingdialekt. Som regel skriv Aslag Haugen songane på engelsk, før Arne Moslåtten omset dei til norsk. I kveld vil største delen av publikum på Fjoset syngje ivrig med på songar som «Mørkemann», «Ei krasafaren steinbu», «Hallo Telenor» og ikkje minst «Den finaste eg veit». Haugen har vanskar med å setje fingeren på kva det er som fengar med musikken.
– Me prøvar berre å gjere så godt me kan, og det er nok ein udefinerbar mekanisme på kvifor me har slått an, seier han.
Ingen av bandmedlemmene var i nærleiken av å drøyme om å oppnå det dei har gjort dei siste 20 åra.
– Det er greitt å ha ambisjonar, men noko slikt kan ein ikkje sjå for seg. Det har jo vore eit eventyr, seier Aslag Haugen.
Ser ikkje langt fram
– Kva er ditt forhold til festivallivet?
– Eg prøvar å få med meg ein festival om eg har høve til det. Det har jo vore ein eksplosjon av festivalar dei siste åra, noko som er veldig bra. Når me spelar sjølve, er det avgrensa kva me får med oss av andre artistar, seier Haugen.
Med 20 år og 12 plater bak seg, er det naturleg å spørje korleis vokalisten ser på framtida for Hellbillies.
– Me har aldri lagt planar som strekkjer seg langt framover. Det er avgrensa kva ein kan planleggje, for det kan skje så mykje, seier Haugen, med fjorårets ulykke framleis i minnet.
– No skal me turnere fram til desember. Deretter blir det eit opphald før me byrjar skriveprosessen att, avsluttar han.
Artikkelen er publisert 31/07-2010
Aktuelle saker:
Aktiv helg
– Observatørrolla var eit spel for galleriet
– Tidenes mål på Åmot stadion
Sterke kulturkommunar
Omdømefokus i debatt om skulen
85.000 til vintermarknadsføring
Heskjeleg moro med hesjing
Presenterte framtidas sentrumsplan
Skieventyret selt til VTM for 1,8 millionar