Redda kulturhuset frå ein større brann

Snarrådig innsats frå tri jenter redda Granvin kulturhus i Seljord frå ein større brann måndag kveld. Då jentene oppdaga brannen var det full fyr i ein trebutt som var plassert oppå badstuomnen i ein av garderobane. – Om ikkje jentene hadde sprunge og varsla så raskt som dei gjorde, hadde det ikkje vart lenge før det hadde teke fyr i treverket inne i badstoga, seier dagleg leiar i Granvin kulturhus, Randi Nordskog.

– Me kjente det lukta røyk. Så oppdaga me at det brann inne i badstoga. Då sprang me i ein dugeleg fart, eg trur aldri eg har sprunge så fort, seier Mari Helene Jensen Fjellstad (11).

For jentene gjorde akkurat det rette, sprang i veg for å varsle rette vedkomande. Og då tri jenter kom skliande og springande sokkelesten ut i foajéen og skreik ut «det brenn, det brenn», forstod vaktmeister ved Granvin kulturhus, Oddvar Øygarden, med ein gong at det var alvor. Han treiv med seg eit brannsløkkingsapparat, storma inn i badstoga og fekk has på elden.

Heldig do-tur

Måndag kveld var mellom seksti og sytti trimmarar i sving inne i idrettshallen. Midt i økta måtte Linda Jensen Fjellstad eit nødvendig ærend. Og, som vanleg er, gjekk ho ikkje åleine. Både systera Mari Helene Jensen Fjellstad og Susanne Gundersen blei med ut i garderoben.

– Eg skulle flytte på nokre av kleda mine. Då kjende eg det lukta røyk av dei. Fyrst trudde eg det hekk røyklukt i etter at me hadde vore på tur ute og brent bål, fortel Mari Helene til VTB.

– Så såg me gjennom glasdøra at det blinka inne i badstoga, og me skjøna at det brann, fortel Susanne. Då la jentene på sprang det fortaste dei vann for å varsle.

– Kjempesnarrådige

Dagleg leiar ved Granvin kulturhus, Randi Nordskog, er imponert over handlemåten til jentene. Torsdag blei heltane påskjøna med diplom, to hundre kroner kvar og ein kinobillett for innsatsen sin.

– Dei var kjempesnarrådige. Hadde dei ikkje handla som dei gjorde hadde det ikkje gått lang tid før det hadde teke full fyr. Dei har heilt klart vore med på å hindre stor skade, skrytte Nordskog.

Påskjøna av brannsjefen

Også brannsjefen i Seljord, Knut Dyrland, var full av lovord over innsatsen til jentene.

– At dei ikkje opna døra til badstoga var veldig lurt. Ein brann utviklar seg fort. Det blir produsert brennbare gassar som tenner ved ein viss temperatur – og utviklar til det som blir omtala som «ein eksplosjonsarta brann», forklara brannsjefen, som takka dei raske jentene med å overrekkje dei kvar sin brannvarslar.

– Di tidlegare ein oppdagar ein brann, di lettare er han å ha med å gjera. Granvin har automatisk brannvarslingsanlegg som går direkte til alarmsentralen i Skien. I dette tilfellet blei ikkje brannalarmen utløyst før vaktmeisteren opna døra til badstoga og røyken valt ut. Dermed rakk ikkje alarmsentralen å varsle tilbake før etter at brannen var sløkt, fortalde Dyrland.