28 000 besøkte Dyrsku'n på fredag. – Betre kontaktannonse enn Dyrsku-opninga skal du leite lenge etter

28 000 var innafor portane i løpet av Dyrsku-fredagen. På den offisielle opninga var det dyreparade, musikk og politisk debatt med fokus på norsk landbruk og den viktige maten.

– Ein applaus til vêrgudane, oppmoda Aasmund Nordstoga som leia den offisielle opninga av Dyrsku'n i kjent stil med stev, humor og snert.

– Ja, for dei har sanneleg ikkje vore greie med oss gardbrukarar i sommar. Eg var ute å slo og det var som å slå i ei riseng, la han til.

Den beste kontaktannonsen

– Folkefest det er me gode på i Seljord. Ja, det er som i songen «årets høgtid er Seljordsjået», sa Seljord-ordførar Beate Marie Dahl Eide.

Ho rosa den veldige dugnadsinnsatsen som seljordingane legg ned kvart år for at Dyrsku'n skal bli det arrangementet det er. Og nytta høvet til å lokke til seg fleire innbyggarar.

– Betre kontaktannonse enn Dyrsku-opninga skal du leite lenge etter. Me har folketal i vekst, men me har plass til fleire. Lærarar, ingeniørar, snikkarar – det som er. Hjarteleg velkomne skal de vere, sa ordføraren.

To representantar frå regjeringa

Både landbruks- og matminister Geir Pollestad (Sp) og olje- og energiminister Terje Aasland (Ap) representerte regjeringa på årets fesjå.

– Kva betyr Dyrsku'n for landbruket, spurte Nordstoga.

– Ein får vist fram landbruket. At landbruket er maskiner og vitskap – landbruket er rock 'n' roll. I tillegg til at det er historie og kultur her, svara Pollestad.

Då Pollestad og mat og berekraftsgründer Hanne-Lene Dahlgren møttest til debatt, var sjølvsagt kosthald og matproduksjon i fokus.

– Kva slags omstilling må bonden gjennom om me skal nå klimamåla, spurte Nordstoga.

– Me må omstille oss, men me må sjå på politikarane og ikkje på bonden. Bonden tener for lite allereie, svara Dahlgren.

Pollestad meinte ein ikkje skal legge klimamåla borti norske kosthaldsråd.

– Eg vil for eksempel ikkje redusere kjøtproduksjonen i Noreg, for så å auke importen av kjøt, sa han.

– Det er heller ikkje på bordet. Kosthald handlar om helsa vår, og eg vil ikkje ete opp ungane mine sin moglegheit til å dyrke, svara Dahlgren.

Pollestad har tidlegare sagt at han synest kjøtfri måndag er noko jåleri. Han stadfesta at han framleis synest det, og meinte at folk må få skinke i kantina på jobb også på måndagar.

– Folk treng ikkje bli vegetarianarar. Det er snakk om å ta kjøttforbruket tilbake til 1989, då synest mine besteforeldre at det var luksus for dei hadde aldri ete så mykje kjøt før. Det handlar om å minske porsjonen på tallerkenen, svara Dahlgren.