Superhemmeleg bakeri

Ikkje ei einaste krone har bakeriet i Lårdal bruka på å avertere. Det tør ikkje dei to bakedamene. Til det er pågangen altfor stor.

Kjem ein køyrande nedover Lårdal kan ein ikkje unngå å observere ein del av livet innanfor vindaugo i hus som ligg kloss i vegen. Slik også ein novemberettermiddag. I ein sving nede i bygda blei det registrert aktivitet inne i eit tidlegare butikklokale.

– Nei, nei, me har så fullt med tingingar at me klarar ikkje meir før jol, er den fyrste reaksjonen til mor og dotter Lundeberg.

Hundre til dagen

Med lovnad om ikkje å setje artikkelen på trykk før tett innunder jol går dei likevel med på ein liten prat, alt medan dei sjauar på. Mor Astrid bløyter kling og Anne Karen smør. I tida før jol blir kring hundre leivar baka ut, steikte og smurde pr. dag. Til saman går noko over tri tusen kling i året ut frå verksemda Anne Karen Lundebergs bakeri.

Klingen er hovudproduktet, men damene bakar også småkaker, som krumkaker og goro, i tillegg til mørlefse og smultringar. Av pågangen frå folk som vil kjøpe utleiar dei at mange saknar dei tradisjonelle bakevarene.

– Den eldre generasjonen er i ferd med å falle frå, og det er mange av dei eldre som baka for andre som no sluttar. Det merkar me, seier dei to.

Heile Sør-Noreg som kundekrins

Det er tredje året bakeriet i Lårdal er i drift, og damene bakar på bestilling heile året. Kundekrinsen strekkjer seg langt ut over nærområdet.

– Gjennom vener og kjende har me fått kundar frå heile Sør-Noreg, smiler dei to, som altså har null trøbbel med avsetjinga.