To gonger karrierebeste

Magnus Krog (23) strålar etter to solide løp i verdscupen i kombinert i Lahti i helga.

Helgas høgdepunkt kom laurdag då Krog kunne juble for 13. plass i møtet med verdas beste kombinertløparar.

– Kjempebra, og eit hakk betre enn eg hadde forventa, seier ein fornøgd Magnus Krog til VTB.

Med eit hopp på 118,5 meter var han nummer 20 før langrennet.

– Eg klarte å få til eit godt prøvehopp, og var trygg på meg sjølv då eg bytta til goddressen til rennet. Målet var å kome blant dei 20 beste totalt, no var eg der alt etter hoppinga, seier ein nøgd Krog.

15 sekundar bak Krog starta langrennsfantomet Felix Gottwald. Krog hadde mål om å halde austerrikaren bak seg fram til løypas høgste punkt. Dei fyrste sekunderingane i løypa viste at Krog berre tapte få sekundar til verdas beste kombinertlangrennsløpar.

– Eg starta nok litt hardt, og roa litt ned til Gottwald kom. Han går utruleg fort, og det var god lærdom å hengje på han, seier Krog, som hang på austerrikaren i to rundar.

– Eg måtte sleppe Gottwald. Viss ikkje hadde eg gått på ein kjempesmell, seier Krog, som berre var 18 sekundar bak tetgruppa ein periode.

Då desse gira opp, fokuserte Krog på å ta att dei løparane som låg nærast han i løypa. Det klarte han, og ein fornøgd Krog kunne strekkje armen i vêret då han passerte målstreken til karrierebeste, berre 33 sekundar bak Johannes Rydzek frå Tyskland som vann.

– Langrennsnivået i kombinert er utruleg høgt, konkluderer Krog, som sjølv hadde 13. og 14. beste langrennstid i dei to konkurransane.

Fredag blei Krog nummer 18, etter å ha gått ut som nummer 27 etter hopprennet.

Han brukte dei fyrste dagane i Lahti til å finne det rette spenningsnivået. Det var fyrst på plass til laurdagens konkurranse.

– Eg har lært utruleg mykje. Eg klarte å kose meg og ha det artig med konkurranse, seier Krog.

No ventar to noregscuphelger før sesongen er over.

– Den internasjonale sesongen er over, så det blir eit høgt nivå på noregscuprenna, seier Krog.