Den største mønstringa nokon gong

Heile 150 deltakarar gjorde Ungdomens kulturmønstring i Vinje til det største UKM-arrangementet i Telemark.

Kulturskulerektor Anders Blystad trur deltakinga på UKM i vesle Vinje er den beste i fylket nokon gong – i alle fall så langt han har klart å rekne ut. 150 deltakarar, fordelt på 64 innslag, er rekordhøgt.

Mykje av årsaka er den store satsinga på ei UKM-veke for alle elevar i 8. og 9. klasse i kommunen, fortel ein glad kulturskulerektor.

– Nærare ein tredel av dei som er i målgruppa, er faktisk med i UKM i år. Det er me veldig stolte av, seier Blystad. Ein svært viktig del av mønstringa er kunsten, og både biletkunst, skulpturar og skrivekunst var representert i stort monn i Vinje. Også matlaging og media stod på deltakarlista.

Men det er i stor grad scenekunsten som dreg folk til arrangementa. Blystad fortel at kulturskulelærarane jobbar hardt for å motivere flest mogleg til å gå på scenen.

– Det er mange som gruar seg fælt før dei skal utpå, og det føregår mykje motivasjonsarbeid bak scenen. Men når dei kjem av scenen etter å ha spela, er det med dei breiaste smila, seier Blystad.

I år var det flest gitarar og rockeband på UKM-scenen i Vinje. Neste år er målet endå større variasjon. Fleire pianospelarar, fleire hardingfeler.

– Me har mange elevar som er nybyrjarar her. Dei kunne absolutt stilt, men ynskte ikkje det. Då får me jobbe fram mot neste år, seier Blystad.