Legitime og rettferdige krav frå kommunane i revisjonskrava for Tokke-Vinje vassdraget

Yt r i n g

Kommunestyret i Tokke skal tysdag 15. oktober handsame kommunens krav til revisjon av Tokke-Vinje vassdraget. Ei viktig sak for kommunane og ei sak Tokke Senterparti er sterkt oppteke av. Medlemsmøte i Tokke Senterparti sluttar seg til innstillinga frå Kraftutvalet men ynskjer å presisere fylgjande punkt:

1. Minstevassføring i Tokkeåi

Tokke Senterparti meiner det er viktig at kommunen prioritetar minstevassføring i Tokkeåi og sideelver. Tokkeåi er gyteområde for den utrydningstruga storauren i Bandak. Storauren er under sterkt press fleire stadar og er òg borte frå vassdrag i Telemark. Det er difor viktig at vassføring i Tokkeåi blir stabil og tilstrekkeleg. I ein felles rapport frå Noregs vassdrags- og energidirektorat og Miljødirektoratet frå september 2013 blir Tokkeåi gjeve høgaste prioritet i Vest-Viken vassregion. I rapporten blir det vurdert opp mot 5 prosent minstevassføring. Tokke Senterparti meiner difor at Tokke kommunestyre bør krevje 5 prosent minstevassføring i Tokkeåi.

2. Miljøfond til Tokke og Vinje kommunar

Kommunane kan ved revisjon gjevast økonomisk kompensasjon til fond i spesielle tilfelle. Tokke og Vinje kommunar står i ei særstilling ved at kommunane var fallrettseigarar i vassdraget, men blei nekta å vere med i utbygginga. For det andre blei utbyggingskonsesjonane gjeve for 60 år fram til 2017. Det var då føresetnaden at det skulle gjevast ny konsesjon og ikkje berre revidere eksisterande vilkår. Statkraft fekk i 2002 omgjort konsesjonane frå tidsavgrensa til evigvarande konsesjonar. For det tredje har det ikkje vore noko minstevassføring i Tokkeåi. Dette har vore særs økonomisk gunstig for Statkraft og noko av denne vinsten bør overførast til eit miljøfond til kommunane. Desse 3 omsyna gjev grunnlag for å krevje eit miljøfond.

Døme på miljøtiltak er å løyve midlar til undersøkingar/tiltak i vassdraget, men også legge til rette for miljøbasert næringsutvikling, reiseliv, turstiar, skiløyper, raste- og badeplassar i og rundt vassdraget.

Tokke Senterparti vil krevje at Statkraft blir pålagt å stille kr 67,5 millionar kroner til eit miljøfond for kommunane. Fondet vil svare til 5 prosent av den inntekta Statkraft har av kraftproduksjonen i vassdraget for eit år. Ei avkasting frå fondet vil vera om lag 2 millionar kroner kvart år som kan nyttast til miljøtiltak i Tokke og Vinje kommunar.

Uttale frå medlemsmøte i Tokke Senterparti

«Til politikarar og rådmann i Nissedal kommune»

Fleire ytringar på side 24.