Nå har T.M. Stjerna to strake sigrar

Torbjørn Moen har fått att for å ha vore tolmodig med T.M. Stjerna.

– Eg visste ikkje heilt kva eg skulle gjera, men eg hadde bruka så mykje tid og krefter at det ville vore for gale å gje ho opp, seier Torbjørn Moen i Seljord.

Han har endeleg fått att for å ha trua på T.M. Stjerna – hoppa han kjøpte som to-åring i Lesja, og som han har temt og køyrt inn sjølv heime på Øverland i Seljord. Den no 8 år gamle hoppa vann i debuten på tråvbanen i 2014. Men etter det venta mange nedturar. Det blei stadige galoppar. Ekspertane sleit med å finne ut kva som var gale.

– Til slutt konkluderte veterinær Ole Einar Sem på Riseng med at ho hadde ein beinsplint i hasen og måtte opererast, seier Moen.

Komplikasjonar

Han var skeptisk til operasjon. Derfor valte han heller å tenke langsiktig og få eit avkom etter T.M. Stjerna. Men heller ikkje her gjekk det som det skulle. Det oppstod komplikasjonar. Folen var daudfødd, medan mora også heldt på å stryke med. Men det gjekk bra med T.M. Stjerna. Og Torbjørn ville gje hoppa ein ny sjanse på tråvbanen. For kring eitt år sidan blei ho operert. I fjor haust var ho tilbake i løpsbanen. Før joletider tråva ho inn til ein fjerdeog ein tredjepremie. I mars i år blei det endå ein tredjepremie, før det verkeleg losna i april. I løpet av elleve dagar vann ho to løp på Klosterskogen travbane, båe med 14 000 kroner i fyrstepremie. Med Vidar Hop i sulkyen tråva ho i mål på vinnartida 1.29.4 over 1700 meter i det siste løpet ho vann på den siste dagen i april.

– Ho har berre blitt betre og betre. Eg har visst at det var tæl i henne, seier eigar og trenar Moen.

Han innrømmer nok at T.M. Stjerna neppe hadde fått fleire sjansar om han hadde hatt ho i trening hos andre. Det ville blitt for kostbart. Men det har gått prestisje i å få henne tilbake i tråvbanen. Derfor var det ein rørt Moen som såg hoppa krysse målstreken fyrst 19. april – tre og eit halvt år sidan den fyrste og den til då einaste sigeren.

Har fått gode tips

Torbjørn Moen bestemte seg for å kjøpe hest då han og familien fekk seg gard i 2004. Han hadde ein ridehest i ungdomen, no var meininga å ha dyr som kunne beite på jorda. Men han kjenner godt Kjell Vidar Braaten – hestetrenaren i Vefall Brekke. Det eine tok det andre, og snart hadde Moen hest som skulle gå løp.

– Eg har fått utruleg mange gode tips og råd frå kyndige hestefolk som Kjell Vidar (Braaten) og Asbjørn Lognvik. Elles har eg bruka sunn fornuft i treninga, seier ein beskjeden hestetrenar.

 

Gjelstad på landslaget

Måndag blei landslaget i telemark presentert. Blant utøvarane som er tatt ut er Kristian Lauvik Gjelstad frå Morgedal.

 

T.M. Stjerna

- Fødd 2010

- Ljos brun hoppe etter Åsajerven og Ola's Jahnna

- 23 startar – 3 sigrar, 1 andrepremie, 5 tredjepremiar.

- Rekord: 29,4 (autostart)

- Har køyrd inn 89 500 kroner

- Eigar og trenar: Torbjørn Moen, Seljord