Åleine på UKM-scenen

Pooploop Minisplash var ikkje spesielt i tvil om dei kom til å gå vidare til fylkesfinalen før UKM i Nissedal onsdag. Dei var nemleg einaste sceneinnslaget.

Det er veldig stille i fleirbrukshuset i Nissedal denne onsdagskvelden. Det er ti minuttar til Ungdomens kulturmønstring skal starte, men det er påfallande få ungdomar å sjå. Dess lenger ein kjem inn i gangane i huset, dess vanskelegare blir det å skjøne kvar mønstringa skal halde til. Har me blingsa på datoen?

Neidå, forsikrar ein gjeng ungdommar som til slutt dukkar opp. Ida Reinholt, Ole Nordli, Patrick Nordby og Jon Espelid i bandet Pooploop Minisplash skal spele, dei. Men det er det ikkje fleire som skal.

– Det er litt kjipt, seier Ida. – Men me har i alle fall gode forhåpningar om å koma vidare, gliser Jon.

Bandet har spela saman i nokre månader. Dei spelar instumentalrock og lagar musikken sjølve.

– Me er ikkje så veldig nervøse, seier Patrick, for høvet kledd i sceneantrekket som er ei stor ulvelue.

Dyktige fotografar

Kulturskulerektor Rune Sanden seier det er synd at det berre er eitt sceneinnslag på UKM i Nissedal i år – men at det er svært høgt nivå på bandet som stiller. Det same gjeld fotografia som var meldt på tevlinga. Framover håpar Sanden, som er fersk som kulturskulerektor, å få fleire til å melde seg på kulturmønstringa.

– Mange av elevane me har i kulturskulen er veldig unge, under aldersgrensa som er 13 år for å gå vidare. Så me håpar at fleire tek steget inn på UKM-scenen etter kvart, seier Sanden.

Einsame ulvar:Pooploop Minisplash stilte meir enn gjerne til bandfotografering før UKM i Nissedal. Sidan dei var einaste sceneinnslag fekk dei pressa for seg sjølve. Øverst f.v. Ida Reinholt og Patrick Nordby. Nede f.v. Jon Espelid og Ole Nordli.