5 år sidan

Seier det med rundballar: Sundag viste flatdalsbønder kva dei meiner om statens tilbod i jordbruksoppgjeret.

Laurdag braut landbrukets organisasjonar forhandlingane om jordbruksavtale med staten. Tilbodet om 13.000 kroner meir per årsverk gav ikkje grunnlag for vidare forhandlingar, meinte forhandlingsleiar og leiar i Noregs bondelag, Nils T. Bjørke. Kravet frå bøndene var 51.000 kroner per årsverk.

Bøndene meiner regjeringa ikkje tek Stortingets vedtak om auka matproduksjon på alvor.

– Nå må Jens bestemme seg om han vil ha eit norsk landbruk, seier flatdalsbøndene i Seljord bondelag som aksjonerte sundag. Kjell A. Sølverød, leiar i Telemark bondelag er imponert over initiativet i lokallaget. Bøndene håpa at den nye landbruksmeldinga skulle gje nytt driv i norsk landbruk, men Sølverød meiner årets jordbruksoppgjer langt på veg er å kaste meldinga på bålet. – Me trudde på ein ny giv i landbruket, men fekk dette midt i trynet i staden. Me blir hengande etter. Andre grupper ser ut til å få meir enn 17.000 kroner ekstra i år, seier leiaren.

– Dette aksepterer me ikkje. Me har venta lenge. Nå er det nok, seier Gunleik Mæland (25), leiar i Seljord bondelag. Han byrja frå botn som gardbrukar som 19-åring, og har måtta jobbe beinhardt ved sida av for å få det til å gå rundt. Mæland peikar på at marginale inntekter ikkje gjev rom for investeringar.

– Eg hadde ikkje trudd det kom til å vere som det blei, og trudde yrket var til å leve av. Eg trivst veldig godt i jobben, men er spent på framtida, seier han. Sølverød og Mæland viser til at bygder gror att. – Me må ta vare på matproduksjonen me har, før han blir øydelagt, seier dei.