Skrekkens musikantar lagar film
– Kanskje me kan skremme fleire til å bli med i korpset, smiler dirigent i Seljord skulemusikk, Gunn Steinstad.
Fredag kveld var musikantane i Seljord skulemusikk samla til filminnspeling på Seljord barneskule. Heilt til midnatt skulle leik, øving, taco og kakekos stå på programmet, i tillegg til innspelinga av den nye musikkvideoen «Corpse» – skrekkens orkester.
I tur og orden tok alle musikantane plass hos sminkørane, og skremmande andlet og tupert hår blei klare for innspeling. Anne Torunn Øverbø og Hans Inge Hagen står for manus, regi og alt det tekniske til videoen. Det er også dei som har tatt initiativ til produksjonen saman med barna.
Artikkelen held fram under annonsen.
Skrekkfilm
Låten «Skrekkfilm» skal korpset spele inn i studioet på Granvin kulturhus, men Steinstad har arrangert han litt om slik at han passar alle dei ulike instrumenta.
– Målet vårt er å ha filmen klar til Hallovenn-arrangementet på Granvin kulturhus i slutten av oktober, fortel Steinstad.
Fleire musikantar
Seljord skulemusikk kunne i haust gle seg over at elleve nye aspirantar starta på øvingane.
– Nå tel korpset om lag 20 små og store – så det blømer, seier Steinstad nøgd, men legg til at dei har plass til mange fleire i korpset.
– Nå vil det vise seg om me får skremt fleire inn i korpset med musikkvideoen me lagar, smiler ho.
Seljord skulemusikk har mange oppdrag på programmet det komande året. Dei skal arrangere loppemarknad på Granvin 21. oktober, vere med på hausttreff saman med andre korps i Bø, og spele på James Bond-kvelden til kulturskulen i Seljord i november. Så er det jolegateopning, joletrefest, 20. dagsfest før 17. mai og fellestur til Bornholm saman med Kviteseid hornmusikk neste sommar.
