Kan bli anlegg til ein halv milliard

Indre Agder og Telemark Avfallsselskap (Iata) håper skogeigarsida også blir med i etablering av eit nytt selskap. Oppgåva blir å ordne søknader som trengst før ei mogleg kjempeutbygging på Langmoen i Nissedal kommune.

Det er planar om å byggje eit kjempeanlegg til ein halv milliard kroner ved avfallsplassen som Iata eig på Langmoen i Haugsjåsund. Anlegget skal innehalde eit forbrenningsanlegg for avfall som det snart ikkje er lov lenger å leggje på deponi. Vidare inneheld investeringa ein dampgenerator for å produsere straum. Planen er også å ha ein pelletsfabrikk, og då er det behov for relativt store mengder massevirke årleg.

Iata har med seg fleire store interessentar i det vidare arbeidet med planane. Tidlegare Aker Grenland Industrier AS, no Stx Grenland Industrier AS (ein del av Stx Europe), har tatt kostnaden på fleire hundre tusen kroner for å få utarbeidd eit prospekt som gjeld satsing på Langmoen energigjenvinning AS og storutbygginga.

Fire interessefelt

I tillegg har det kome på plass ei intensjonsavtale med eit stort firma i Tyskland som fyrar vekk tidlegare problemstilling om korleis ein skal bli kvitt pelletsen. Firmaet er gira på å kome i gang med anlegget på Langmoen, og ynskjer å stå for både drifta og å selje pellets ferdig pakka i sekkar ut i Europa.

– Ein draum, seier konsulent Bjørn Haugland i Iata om avtala med tyskarane.

Planen er no å starte fase 1 for å etablere Langmoen energigjenvinning AS. Selskapet skal innan eit halvt år prøve å få gjennom diverse nødvendige offentlege søknader, greie ut støtteordningar og sjå endå meir på økonomiske rammer.

– Når godkjenningane ligg til grunn, er det mykje lettare å få med investorar, seier Haugland.

Selskapet skal ha med interessentar frå avfallssida, energisida og dei som skal stå for den tekniske biten. Vidare er skogeigarsida ynskt velkomen.

– Me har no hatt eit positivt møte med AT Skog, og me håper på ei positiv tilbakemelding frå dei når det gjeld å vere med i fase 1, seier Haugland.

Iata sin del i selskapet blir 167.000 kroner. Det meiner Haugland er verdt pengane, for i neste omgang kan ein ende opp med storanlegget han trur har livets rett.

Mange arbeidsplassar

– Oppbygginga av anlegget lagar arbeidsplassar, avfall blir til energi, det blir produsert straum og i tillegg pellets i ei tid ein snakkar om miljø. Dessutan vil det bli 16 nye arbeidsplassar, og vidare får me behalde dei me har i dag. Blir det ikkje noko av prosjektet, må me i staden trappe ned på tal tilsette og det blir bare att ein omlastings- og gjenvinningsstasjon på Langmoen, seier Haugland.

Fleire av aktørane som er inne i bildet med tanke på storutbygginga, er store aktørar med eigeninteresser. Det meiner Haugland er viktig for saka. I tillegg er representantskapet i Iata (representantar frå dei fire Iata-eigarane, kommunane Nissedal, Drangedal, Nome og Åmli), veldig positive til gigantplanen.

– Dette er veldig spennande. Tenk å byggje for ein halv milliard i Nissedal! Det er nesten så eg grøsser og er stolt når eg tenker på det, seier Haugland, og ventar i spenning på om også skogeigarsida er klar for eit lyft av dimensjonar ute i tømmerbushen i distrikts-Noreg.