Musikkbingen på flyttefot
For å gjere plass til det nye biblioteket som skal kome ved Granvin kulturhus måtte den mobile musikkbingen på flyttefot. Og det med centimeters margin.
– Bingen blir like tilgjengeleg som før, me måtte bare flytte han litt for å gje plass til biblioteket. Men det var litt av ein prestasjon å få han plassert, fortel kulturhusvert Randi Nordskog på Granvin kulturhus i Seljord.
Vaktmeister Leif Torp fortel at det var Skorve entreprenør som tok oppdraget med å flytte musikkbingen frå området der han blei plassert utanfor kulturhuset i 2008 til det opne holrommet mellom garderobane på Granvin.
Artikkelen held fram under annonsen.
– Det er mogleg det ein gong var ein plan med dette opne arealet med veggar på alle sider, men utan tak. Det har i alle fall stått tomt i 20 år, fortel Torp.
Han var til stades då Skorve entreprenør leigde inn ei 90 tonns mobilkran førre fredag for å lyfte den 8 tonn tunge musikkbingen på plass.
– Det var ikkje så mykje plass å gå på i avlukket. Eg vil tru det var maks 10 centimeter på kvar side, men arbeidsfolket med anleggsleiar for det nye biblioteket i spissen plasserte musikkbingen fint og pyntelig på plass, seier Torp.
Han er nøgd med at det tomme avlukket kjem i bruk, og at bingen ikkje blir fullt så synleg.
– Brakka var jo ikkje så flott å sjå på slik ho stod tidlegare, seier Torp.
Måtte flytte
Anleggsleiar for det nye biblioteket, Kevin Slettemeås, hos Skorve entreprenør seier at det var behov for å flytte musikkbingen slik at dei kan starte på grunnarbeidet utanfor Granvin.
– Planen vår er å starte grunnarbeidet for påbygget som skal huse bibliotek nå i mai, og bygget skal vere på plass før jol, seier han.
Opna i 2008
Det mobile øvingslokalet blei plassert utanfor Granvin kulturhus i Seljord, og i november 2008 blei det tatt i bruk for fyrste gong. Dette skjedde på same tid som då kulturskulen flytta inn i nye lokale på kulturhuset.
Artikkelen held fram under annonsen.
Musikkbingen blei gjeve som gåve frå Musikkverkstadordninga som blir administrert av Norsk kulturråd. Då det 21 kvadratmeter store øvingsrommet kom til Seljord hadde det ein verdi på 600 000 kroner.
