Kort veg fram til pallen i ungdoms-NM

Lillestrøm: Julie Noraberg Nilsen (15) blei nummer fem i kule under UM (NM for yngre) på Lillestrøm denne helga. Seljord-jenta er den første lokale utøvaren på fleire år som har klart å kvalifisera seg for eit nasjonalt meisterskap i friidrett.

– Eg er nøgd. Det var kort veg fram til sigerspallen, opsummerar Nilsen som innrømmer at ho var litt nervøs før start.

Ho støytte 10,12. Bronsen gjekk på 10,34. Sølvet på rundt 11 meter.

– Eg har 10,61 som personleg rekord. På trening har eg støytt 10,87, seier ho.

Dette var hennar første nasjonale meisterskap.

– Prestasjonen var bra, men ikkje hundre prosent, seier Seljord-jenta som innrømmer at det hadde vore kjekkare på turen heim om ho hadde hatt medalje i kofferten.

Julie var ikkje med på UM innandørs i vinter.

– Det blir vurdert seinvinteren 2016. Meisterskapen går då i Trondheim. Det er ei lang og krevjande reise, understrekar ho.

Vanskelege forhold

Heime på Seljord manglar Nilsen både skikkeleg anlegg og treningsmiljø.

– Neste haust vil eg søke skule i Lunde. Det blir neppe aktuelt å flytte, seier Nilsen som innrømmer at for kulekarrieren ville det kanskje vore ein fordel å prøve noko nytt.

Seljord-jenta har vore med på åtte stemne i sommar. Med eit unntak har ho vore på pallen.

– Eg har hatt ein veldig bra sesong. Ingen tvil om det, understrekar ho.

Eit stykke fram

Gullet gjekk på godt over 11 meter.

– På det nivået er ikkje eg i dag. Eg har vore stabil rundt 10,50, så noko lengre enn 10,12 hadde eg håpa å støyte her i dag, seier ho.

Julie Noraberg Nilsen kastar og litt diskos. Ho trenar friidrett to gonger i veka.

 – Det er kule som har klar førsteprioritet, seier ho.

– Far dreiv litt med springing då han var ung. Det var han som ville at eg skulle begynne på friidrett. Litt slump har det vore, seier Julie om i fjor framheva seg som ein veldig fysisk kastar. I år har ho gjort store framsteg teknisk.

 – Men framleis er det mykje å rette på, avsluttar ho.