50 000 kroner til bakeri og kafé

Nissedal formannskap har gjeve tilskot på 50 000 kroner likt fordelt på bakeri og kafé i Treungen.

I samband med at Tore Karlsen har starta bakeri i Treungen har han søkt kommunen om etableringsstøtte. Han skal også investere i serveringslokale i etasjen over bakeriet. Samla er investeringane for dei to etableringane på rundt ein halv million kroner.

Bakeriet har fire fast tilsette, og ekstrahjelp i høgsesongane. Tore Karlsen opplyser til VTB at bakeriet hadde eit veldig godt sal i sommar.

Verksemdeigaren søkte ikkje kommunen om ein oppgjeven sum. Rådmannen tilrådde politikarane å gje eit tilskot på 25 000 kroner.

Plussa på

– Dette er viktige arbeidsplassar, og bedrifta er viktig for utvikling av Treungen sentrum, sa ordførar Halvor Homme (Ap) i formannskapet.

Anne-Nora Oma Dahle (Sp) minna om at reiselivskommunen treng mangfald i sentrum.

Etter ein diskusjon blei politikarane samde om å løyve 25 000 kroner til bakeriet, og at ein samstundes også gjev 25 000 kroner til etablering av kafé. Tilskot blir utbetalt etter dokumenterte utgifter ved rekneskap eller kvitteringar.