Tradisjon blir halden i hevd

Hest og bil var sentralt på årets Kviteseidmarken.

Tråvsporten blei eit populært innslag på Kviteseidmarken i slutten av 1880-åra. Tråvarar frå heile fylket kjempa om heider og ære. I år er Øvre Telemark tråvlag 130 år og på Kviteseidmarken i helga var dei firbeinte som vanleg eit sentralt innslag i markensstemninga.

Arnt Hølland har gode minne frå iskøyring med hest. Det var slik han debuterte i tråvløp på Oftevatn og Sundkilen for nokre år sidan. Sidan har han hatt solide tråvarar som Kvitson (951 000 innkøyrde kroner) og Druasel (663 500) på stallen i Vefall i Ytre Seljord. For tida har ikkje Hølland hestar til start på tråvbanen, men til Kviteseidmarken hadde han med seg 4 år gamle Villdensky til Sundkilen-løpet laurdag.

– Oi, eg gløymte å dra øyrehetta, oppdagar kusken ti minuttar etter målgang.

Det siste grepet for å få ekstra fart på oppløpet påverka ikkje resultatet. Villdensky kryssa målstreken fyrst med god margin etter 1600 meter i konkurranse med tre andre hestar som heller ikkje har gått rikstoto-løp.

– Han kunne starta som 3-åring, men eg ville vente. Han manglar litt fart. Lokalkøyringar er fine til å venne seg til løp. Når det vårast er han kanskje klar til start, seier Hølland.

– Han er litt urutinert og feila frå start, men det gjekk greitt, held han fram, etter å ha motteke pokal og Kviteseidsmør i premie.

22 hestar stilte til start i dei totalt 6 løpa på isen. Hestar frå fem fylke deltok og åtte kommunar i Telemark var representert. Olav Teigland frå Vinje og fjordingen Sørlis Arga vann Markensløpet og blei kåra til løpets finaste ekvipasje.

Hestekrefter var eit stikkord for Kviteseidmarken. Tidlegare har NMK Vest-Telemark hatt billøp med fart og spenning på isbanen. Til årets marken var Autostrada frå Skien og Oslo på plass i Kviteseid med bilutstilling. Bestseljarar som Ferrari, Maserati, Bentley, Land Rover og Range Rove var å sjå i kommunesenteret, og etter tråvløpa var det showkøyring med bil på Sundkilen.

Sol og godt kaldt vintervêr skapte den perfekte ramma for Kviteseidmarken fredag og laurdag.

– Me er svært godt nøgde med årets Kviteseidmarken. Det var mykje folk og god stemning. Den eldgamle markenstradisjonen blir halden i hevd, konkluderer Gunnar Ruud frå næringslaget i Kviteseid som står bak arrangementet.