Smør i tonnevis

Nye Telemarkskyri Meieri AS i Fyresdal har starta prøveproduksjon av smør. Målet frå 2010 er 500 tonn smør i året. Blir det også pultostproduksjon, kan det vere aktuelt å ta inn lokal mjølk frå telemarkskua.

Fredag var ein i gang att med å produsere smør i lokalet der tidlegare Telemarkskyri Meieri AS heldt til på Molandsmoen i Fyresdal.

– Då er me i gang att. Me har starta prøveproduksjon av smør, og når prøveresultata er klare skal produktet ut til butikkar i fylket. Me håper det skjer før påske, seier meieristyrar Terje Erik Garberg.

Mattilsynet set krav om ein prøveperiode, og derfor blir det i fyrste omgang bare opna for sal innan Telemark.

Pakkeline

Smøret blir laga av Tine-fløyte som er frakta frå Sem i Vestfold. I ein 14-dagars periode no reknar den nye verksemda med å produsere 1.000 kilo smør. Garberg fortel at då har ein passert heile fjorårstalet for meieriet som gjekk konkurs i 2008.

– Produksjonen av smør hadde gått like bra i fjor om ein hadde fått nok fløyte. Det var ikkje tilgang på nok råstoff for å lage mykje smør, seier Garberg.

Den gongen kom råvara frå telemarkskyr i vestfylket. Det kan igjen bli aktuelt for meieriet å ta inn slik lokal mjølk, sidan planen er å starte med pultost også.

Førebels blir smøret handpakka ved meieriet. Tanken er å kjøpe ei pakkeline slik at smørbegera blir fylte automatisk. Garberg fortel at når lina er på plass, blir det skiftordning i verksemda som i dag har to tilsette og ei tilkallingshjelp.

Utnytte råstoffet

– Hovudpoenget no er at me skal få økonomi i drifta. Vidare ynskjer me å utnytte råstoffet fullt ut. 60 prosent av fløyten i meieri-Noreg blir ikkje utnytta i dag, fortel meieristyraren i Fyresdal.

Målet for meieriet på Molandsmoen er å produsere 500 tonn smør i året frå 2010.

– Det er heftig mykje, men det er realistisk, seier Garberg.

Om det også blir produksjon av pultost i verksemda, er ein så og seie tilbake til utgangspunktet for fyrstegongsetableringa der det var fokus på tradisjonelle produkt.

– Sjølv om det gjekk galt den gongen, er det aldri så galt at det er godt for noko. No er me i gang att, og her skal det bli varige arbeidsplassar, seier ein optimistisk Garberg.

Laurdag blir det ope meieri med omvising, og då får folk også høve til å sikre seg det nye smørproduktet.

– Prisen vil vere konkurransedyktig overfor anna delikatessesmør, lovar Garberg.