Formannskapet var splitta om seniorbustad-prosjektet

Det er tilrådinga frå formannskapet til kommunestyret som får saka tysdag.

Notodden boligbyggelag (NOBO) og Vinje pensjonistlag har sidan 2021 arbeidd med planane om seniorbustader på Heimdal-tomta i Rauland. Til nå har berre fire personar skrive avtale, i tillegg har kommunestyret bestemt at kommunen kjøper éin. Totalt må åtte leilegheiter vera tinga før spaden blir sett i jorda. Om ikkje kommunen forpliktar seg til meir enn den eine, er det fare for at prosjektet ikkje blir realisert, kjem det fram i sakspapira til formannskapet.

Kommunedirektør Jan Myrekrok har skissert fem ulike alternativ for vegen vidare. Han føreslo det billigaste; å gå inn med det fyrste innskottet i fire leilegheiter, men fjerne fellesareala. Bakgrunnen for det er at marknaden ikkje har «respondert tilstrekkeleg på dette tilbodet». NOBO har ikkje vore avvisande, men dei har vore utrygge på korleis dei fire kjøparane som har skrive kontrakt vil stille seg til denne endringa.