Slik skal kommunen få lys i gamle hus

Vinje kommune har eit mål om 200 nye innbyggjarar i løpet av seks år. Nå kan kommunen bli ein pilot i Fortidsminneforeiningas prosjekt «Lys i gamle hus».

Saka har vore til politisk behandling tidlegare, men blei utsett då ho var til formannskapet i april. Politikarane ynskte lokal prosjektleiing, og ikkje at denne skulle vera tilsett i Fortidsminneforeininga. Formannskapet får saka tilbake torsdag.

Det er nå semje mellom kommunen og fortidsminneforeininga om at prosjektet får lokal leiing og at det blir den nytilsette Vinjelosen som får «Lys i gamle hus» som del av sitt ansvarsområde – stipulert til 20 prosent av stillinga, kostnadsrekna til om lag 110 000 kroner i året.