Vil ikkje gje fritak frå buplikta på landbrukseigedom

Søkjarane, Ingrid Louise Falkenberg og Kristian Falkgård har kjøpt Nigard Ekre, på drygt 1100 dekar totalt, av far til Inger Louise, Hans Gustav Falkenberg, for 2,35 millionar kroner. Sidan 2006 har våningshuset på eigedomen, som er frå om lag 1850, blitt nytta som fritidsbustad.

Falkenberg og Falkgård skriv i søknaden til kommunen at dei ikkje har planar om å flytte til eigedomen, og viser til at tunet på eigedomen er utsett for jordskred og flaum. Det blir og vist til at tilkomstvegen fleire gonger har rent bort. Dei ynskjer heller å pendle til eigedommen, noko som vil gje betre tid til rassikring og få til reint drikkevatn til garden.

I søknaden skriv paret at dersom kommunen finn det vanskeleg å gje fritak frå buplikta, vil dei be om ei utsetjing på seks år – då vil det yngste barnet deira vera ferdig på vidaregåande skule.