Anne Gro og Hans fekk pris. – Likar spesielt godt at dei har skapt eit inkluderande miljø som er ope for alle

Grunngjevinga frå juryen var: «Seljord økologiske hage har på førebiletleg vis skapt ein arena for læring, inkludering og fellesskap i hjartet av Seljord sentrum. Gjennom sitt engasjement for økologisk dyrking og berekraftig matproduksjon bidreg foreininga til å auke forståinga for desse viktige temaa blant den oppveksande generasjonen. Det tette samarbeidet med skule og barnehage har gjort hagen til ein naturleg læringsstad for alle born og unge i Seljord, som får førstehands erfaring med dyrking, berekraft og naturens krinsløp.

Hagen har òg ei rolle innan integrering av innvandrarar. Ved å tilby sommarjobb til born av innvandrarar gir dei ungdom i lokalmiljøet moglegheit til å tene pengar, oppleve meistring og utvikle ansvarskjensle i eit trygt og inkluderande miljø. Juryen likar spesielt godt at dei har skapt eit inkluderande miljø som er ope for alle menneske, uavhengig av alder, bakgrunn og livssituasjon.»