Frostrøyk og salmesong fylte rommet då 40 var samla til lysmesse

Då sokneprest Møyfrid Lunde fekk spørsmål frå ungdommane, fekk ho lyst å arrangere lysmesse igjen.

– Det var nokre elevar frå Kvitsund som lurte på om vi hadde messe i gamlekyrkja som dei kunne vere med på, seier Lunde.

Til vanleg er det berre messer om sommaren i gamlekyrkja. Førre veke vart Kviteseid gamle kyrkje fylt med levande lys, folk og song – for fyrste gong på fem år blei det invitert til lysmesse.

Det var lysmesse i Kviteseid fyrste gong i 1994. Denne blei arrangert kvart år fram til 2016.

Lunde kjente til at det hadde vore ein tradisjon med kveldsmesse tidlegare og bestemte seg for å gjere det igjen. I samarbeid med eit par lærarar fekk dei organisert fakkeltog frå Kvitsund til kyrkja, slik tradisjonen har vore.

– Me arrangerer lysmessa for å bidra til et mangfaldig og rikt gudstenesteliv. Og for elevane som bur her tre år av livet er det eit høve til å kome inn i mellomalderkyrkja som ligg i gåavstand frå skulen, seier soknepresten som også har opplevd at mange i bygda har etterspurt denne spesielle messa.