Beredskap i hyttekommunar

Det er mykje snakk om beredskap for tida og det er bra. Sjølvsagt kryssar me alle fingrar for at ulike krisescenario ikkje verkeleg vil skje, men det er klokt å vere førebudd i ei uroleg verd. 

Fleire av kommunane i Vest-Telemark må planlegge for ei spesiell utfordring, og det er sterk auke i folketalet i ein krisesituasjon. Byområde er sårbare ved hendingar som råkar forsyning av mat, vatn og straum. Over 80% av innbyggjarane i Noreg bur no i by eller tettstad. I 1940 var talet 50%, og sidan då har det samla folketalet nær dobla seg. Det betyr at det no er langt fleire enn ved utbrotet av andre verdskrig som potensielt vil søkje ut av byane i ein krisesituasjon.

Forsvarets forskningsinstitutt publiserte i fjor rapporten «Krig i Norge – scenariobasert analyse av humanitære behov». Der kjem det fram at Oslo og områda rundt er ekstra utsett «med sårbar kraftforsyning i tillegg til generelle humanitære behov. Det er lite lokal kraftproduksjon i Oslo og Akershus. Dersom det blir utfordringer med kraftoverføring til Oslo-regionen fra andre deler av landet, kan dette få svært store konsekvenser, spesielt hvis det skjer i vinterhalvåret. Tiltak for å hindre kaos og ukontrollert selvevakuering i en slik situasjon vil være viktige.»