«God dag mann økseskaft svar» frå ordføraren i Kviteseid

Ordførar Tarjei Draugedal har prøva å svara på spørsmål frå veljarar i Fjågesund om kva som var kriterier/kjenneteikn på kva som skulle til for at ein kommunal veg skulle bli privatisert, eller framleis bli finansiert over det kommunale budsjettet.

Det gjekk ikkje så bra. Fyrst kjem han med eit svar der fordelinga av kostnadene på to vegar som er føreslått privatiserte blir publisert. Det har ingenting med spørsmålet frå veljarane i Fjågesund å gjera. Bare kanskje litt med kor lite Kviteseid kommune kan spare på privatisering av kommunale vegar, sidan kommunen likevel må betale ein del av kostnadene.

I andre runde, der spørsmålstillarane, heilt korrekt, påpeikar at dette ikkje var svar på spørsmålet, svarar ordføraren med at kommunen har behov for økonomisk innsparing. Det er ingen i tvil om. Etter år der politikarar og administrasjon har vanstyrt kommunen økonomisk, og truleg er på god veg til «Robek-lista» (= Staten tek over styringa sidan kommunen ikkje greier å styre økonomien, på folkemunne kalla «Rotebukk-lista»), veit «alle» dette. Men dette hadde ingen ting med spørsmålet frå Fjågesund om kriterier for privatisering å gjera.