Hovudplagg, folkeskikk og ungdommens klokskap

I det sarkastiske diktet Ungdommens råskap frå 1967 tok Jens Bjørneboe ungdomen i forsvar og avkledde maktas dobbeltmoral i forsøket på å disiplinere dei unge. Snart 60 år seinare har lite endra seg – behovet for kontroll er like sterkt, og tematikken i diktet er framleis like aktuell.

Dette vart tydeleg då den store «caps- og luedebatten» tok fyr i Seljord. Debatten kulminerte i kommunestyret 20. mars, der fleirtalet vedtok å fortsatt forby hovudplagg innandørs i skulane. Mot Senterpartiet og Raudt sine stemmer samla Høgre, Framstegspartiet og Arbeidarpartiet seg mot det moralske forfallet dei meinte ville fylgje av ein meir liberal hovudplaggpolitikk.

For så vill, galen, sjuk og destruktiv har ungdomen i Seljord blitt – at dei vågar å krevje retten til å bruke hovudplagg innandørs på skulen! (fritt etter Bjørneboe.)