Høyringsuttale frå Vest-Telemarkrådet: «Eit godt kollektivtilbod både til og internt i regionen er avgjerande for positiv utvikling i Vest-Telemark»
Vedtak i Vest-Telemarkrådet 30. august 2022:
Vest-Telemarkrådet har samferdsle og mobilitet høgt på agendaen. Eit godt kollektivtilbod både til og internt i regionen er avgjerande for positiv utvikling i Vest-Telemark.
Artikkelen held fram under annonsen.
Strategien er ambisiøs med tanke på bruk av ny teknologi og digitale løysingar, men rådet vil understreke at ein viktig premiss for å lukkast er betre samordning og samarbeid mellom ulike offentlege etatar og nivå når det gjeld koordinering av ulike transportbehov.
Vest-Telemarkrådet vil understreke at ekspressbusstilbodet til og gjennom regionen er ryggmargen i kollektivtilbodet, og at positiv utvikling av dette er viktig både for innbyggjarar, næringsliv og tilreisande. Vest-Telemarkrådet viser til VTFK sitt vedtak om å leggje busstransporten Seljord - Skien ut på anbod, og til Vest-Telemarkrådets og fylkestingets vedtak i denne saka:
– Fleire enn dagens 11 avgangar på vekedag må ha stopp eller start i Seljord. Dette er spesielt viktig på ettermiddag/kveld.
– Det må vere korrespondanse mellom regionrute til/frå Seljord og Haukeliekspressen.
– Det må vere korrespondanse mellom tog i Bø og regionrute til/frå Seljord.
– Det må vurderast om nokre avgangar kan ha start/slutt i Åmot.
– Det må vurderast om det er mogleg å ha nokre direkteavganger mot Torp.
– Reisande frå Vest-Telemark til Grenland må sleppe bussbyte i Bø.
Artikkelen held fram under annonsen.
– Reiseopplevinga med tanke på standard og bagasjeplass må vere på nivå som i dag.
Vest-Telemarkrådet vil ha stort fokus på desse punkta i dialogen med fylkeskommunen etter at anbodet er iverksett, slik at ein sikrar ei utvikling i tråd med ambisjonane i denne strategien.
Vest-Telemarkrådet ser at det framleis er eit potensiale for å utløyse fleire pendlarreiser mellom kommunesentra i regionen. Til dømes er det ikkje mogleg å ta buss direkte frå Seljord til Kviteseid om morgonen, men det er godt med alternativ når det gjeld retur på ettermiddagen.
Fylkeskommunen må sjå nærare på korleis teknologi kan nyttast til å tilby ulike former for bildelingstenester, og sjå dette i samanheng med det øvrige kollektivtilbodet.
Drosjer er ein viktig del av kollektivtilbodet, spesielt i distrikta. Vest-Telemarkrådet er uroa over situasjonen for drosjenæringa. Kombinasjonen av eit liberalisert regelverk og staten si organisering av ulike typar transport (t.d. pasientreiser), gjer situasjonen for næringa svært krevjande. Fylkeskommunen bør få ansvar for å samordne meir av det offentlege transporttilbodet.
Vest-Telemarkrådet saknar ei sterkare kopling til arbeidet med nullvisjon og trafikktryggleik, og vil i så måte peike på våre forslag til tiltak her. I vår region er utvikling av kollektivtilbodet for unge og arbeid med nullvisjonen to sider av same sak:
Frå utkast til plan for nullvisjon i Vest-Telemark, side 5:
Fylkeskommunen er ein viktig aktør i det vidare arbeidet. Dei har eit overordna ansvar for trafikktryggleik, samstundes som dei har ansvar for vidaregåande opplæring og kollektivtrafikk, som er to sentrale område i det vidare arbeidet. Det er ei regional forventning om at fylkeskommunen blir ein aktiv medspelar for å realisere nullvisjonen i Vest-Telemark.
Artikkelen held fram under annonsen.
Framlegg til tiltak, side 11–14:
Fellestiltak 1: Bruke og utvikle haldningskampanjar retta mot ungdom og unge vaksne
Fellestiltak 2: Regional skyssordning på kveld og helg - «trygt heim»
Fellestiltak 3: Innføre ordninga «nullvisjon Vest-Telemark», etter modell frå Agder
Vest-Telemarkrådet vil i denne samanhengen spesielt trekkje fram at fylkeskommunen må engasjere seg sterkare for å få på plass ei regional skyssordning for unge «Trygt heim». Dette byggjer oppunder ambisjonane om utvikling av flexiruter og bestillingsskyss til ei prioritert målgruppe i strategien.
Vest-Telemarkrådet
