Ny runde om privatisering av kommunale vegar, reelle innsparingar

Saka om privatisering av kommunale vegar i Kviteseid var sist oppe i kommunestyret 13.02.25. Etter framlegg frå Gunnar Ruud (H) blei saka då utsett fordi kommunestyret ville ha ein betre dokumentasjon på innsparinga privatiseringa kunne gje.

Saka kjem nå opp på nytt, men me kan ikkje sjå at kommunedirektøren har gjort som kommunestyret bad om, men kjem med same reknestykket som sist, bare med auka meterpris.

Reknestykket er like enkelt og mangelfullt som sist. Kommunedirektøren tek samla utgifter til kommunale vegar og delar på antal meter, og finn slik ein meterpris. Men det er no som sist ingen spesifisering av kostnadene ved dei einskilde vegane. Det seier seg sjølv at kostnadene er forskjellig for ulike vegar, t.d. mykje meir kostbart der snøen må køyrast bort, vegane feiast, og ikkje bare snøen kan brøytast til side.