Villrein og jaktfrie sonar

Rasmus Hansson, tidlegare generalsekretær i WWF, sit no på Stortinget for MDG. I Nationen den 13. januar hevdar han at «Jegerne eier foreløpig hele landet». Han er misnøygd med denne tilstanden og vil at staten skal taka denne eigedomen frå jegerane for å forby jakt i nasjonalparkane. Jegerane må vekk slik at Hansson, NRK villmarkingen Lars Monsen (Dagsrevyen 06.01.25) og naturfotograf Arne Nerva frå SV, (Nationen 14.03.25) kan få oppleva ekte, intakt natur; ein natur utan jegarar og matproduksjon, men full av turistar og bikkjer.

Stortingsmann Hansson er slett orientert om eigedomstilhøva her i landet. For det er ikkje jegerane som eig inn- og utmark i Noreg. Det er grunneigarane, det vere seg offentlege eller private. Denne eigedomsretten har me private hatt sidan forfedrane våre kom hit. Dei danske eineveldskongane freista å innføre den romrettslege doktrinen om Kongens «overeiendomsrett» her i Norge, men «Den dansk-norske kongen våget ikke å gjøre overeiendomsretten gjeldende overfor de norske odelsgårdene, men datidens jurister mente at kongen hadde anerkjente rettigheter i allmenningene…. Da Grunnloven ble vedtatt i 1814, falt ordningen med kongens overeiendomsrett bort.» (NOU 2007: 14, s.106). 

Samstundes vart odelsretten skriven inn i grunnlova etter framlegg frå Vest-Telemarkingen Talleiv Huvestad. Fram til nyleg var nedre grense for odelsjord ti dekar innmark og hundre dekar produktiv skog. Det vil seie at då Noreg endeleg vart kvitt det danske tyranniet i 1814, var det meste av landet odelsjord. Det er såleis ikkje kongen, staten, politiske parti, jeger- eller turistorganisasjonar, som eig privat inn- og utmark, men grunneigarane sjølv.