«Viss det finst ein kommune som klarer å drifte alt dette på eit lågare nivå, så vil eg gjerne lære av dei»

Saksopplysning til Erling Brauti sitt lesarinnlegg.

Senterpartiet i Kviteseid har aldri gått inn i forhandlingar der det å ikkje reversere privatisering av kommunale vegar låg som eit absolutt krav. Faktum er at dette verken vart diskutert eller var ein del av forhandlingane. Kvifor eitt parti vel den eine sida framfor den andre har eg ikkje innsikt i – men det finst sikkert gode grunnar til det.

Så er det vanskeleg å ikkje kommentere Erling si harselering med den politiske og administrative styringa av kommunen. Me har to store sektorar i budsjettsamanheng: helse og oppvekst. Desse utgjer om lag 85 % av driftskostnadane i Kviteseid kommune – i hovudsak tenester som innbyggjarane får direkte. Dei resterande 15 % dekker alt anna: politikk, næring, teknisk drift, fellestenester, kommunedirektør og mykje meir. Viss det finst ein kommune som klarer å drifte alt dette på eit lågare nivå, så vil eg gjerne lære av dei.