Trude blei historisk på årsmøtet i Bondelaget

Trude Flatland frå Øyfjell og Mikkel Aanderaa, opphavleg frå Flatdal, blei valt som høvesvis leiar og nestleiar i Telemark Bondelag på årsmøtet i Bø laurdag.

Om lag 50 utsendingar og gjester møtte opp til årsmøtet på Bø hotell, melder Bondelaget i ei pressemelding.

Trude Flatland er den fyrste kvinnelege leiaren av Bondelaget. Den nyvalde fylkesleiaren som fyller 39 år på ettersommaren er bonde i Øyfjell. Der driv ho og mannen gard med ammekyr. Flatland er også rådgjevar i Norsk Landbruksrådgjeving.

I sin siste tale som fylkesleiar i Telemark Bondelag, la Aslak Snarteland frå Fyresdal vekt på at bøndene krev meir handling frå ei regjering som snart har nådd over halvgått løp.

– Me byrjar no å bli svært utolmodige, sa han.