Vil utvikle campingplassen med meir bubilparkering

Nå har formannskapet i Kviteseid gjeve grønt ljos for planane om å leggje til rette for 10–12 nye bubilplassar og meir parkering for dagsbesøkande.

Kai-Rune Aasen og Hilde S. Gustavsen Skjauff tok over campingplassen ved Flåvatn i 2021. Det er i underkant av 100 faste campingturistar her. Dei siste åra har talet på gjester auka, og spesielt er det pågang av gjester med bubil. Problemet er at det er få bubilplassar på Kilen camping. Derfor må mange av dei moglege bubilgjestene reise vidare i mangel på plass.

Dei søkte kommunen om å opparbeide nye plassar for bubilar to stader på campingplassen. På det eine området, Utsikten nær kiosken, er det planar om 10–12 bubilplassar, i tillegg til 6–8 parkeringsplassar for daggjester. På det andre området, Panorama, er det snakk om å nytte arealet til bubilar i staden for hytter som reguleringsplanen tillet.