Eventyrleg reise for «Myllargjengen»

– Det er heilt fantastisk og kolossalt inspirerande, seier Ellen Nordstoga som ein trygt kan seie er "mor" til «myllarane». Ho fortel at ho vart kontakta av generalkommissær Håkon W. Freihov som er prosjektleiar for Noregs deltaking på Verdsutstillinga. Han kjende til Arve Moen Bergset og det gode ungdomsmiljøet rundt han. Eg synst beint ut at det er ærefullt at me har fått eit slikt oppdrag, seier Ellen.

I tillegg til sjølve «Myllargjengen», vert også syskina Hill og Øystein Romtveit frå Vinje med. Likeså felespelar Trygve Vaagen frå Rauland. Stordansaren Bjørn Strand frå Dombås vert og med til Spania. På Verdsutstillinga i Sevilla skal «Myllargjengen» ha konsertar på den gedigne friluftsscena Palenque 18. og 19. mai.

Dei kjem i godt selskap i Sevilla, for både Sissel Kyrkjebø, Sigmund Groven og mange andre kjende norske aktørar skal opptre. NRK har og plukka ut filmen «Myllargutens barn». Den skal visast på mange TV-stasjonar under utstillinga, så det vert god representasjon frå Vinje. Men det kostar å vere i Spania ei heil veke, men for «Myllargjengen» skal alt vere gratis. Statkraft syter for dette, og Vinje kommune er og ein god støttespelar. Vinje Musikkskule har sett av timar, slik at Ellen kan øve med den glade ungdomsgjengen. På grunn av at «myllarane» bur så spreidd, skal fridagar og feriar nyttast til øving.