Paven skal til Irak på fredag

Trass i korona og terror vil paven vitja mellom anna Bagdad og Mosul i Abrahams fødeland.

Irak har til no ikkje fått vitjing av nokon pave, som det einaste av dei bibelske landa. Johannes Paul II hadde planlagt ein tur i 1999, men Saddam Hussein trekte invitasjonen, då han synst paven ikkje hadde teke skikkeleg avstand frå dei internasjonale operasjonane i landet.

Det er rikeleg med grunnar til å droppa turen no òg, og både terroråtaka og smittespreiinga i Irak gjer det vanskeleg. Men paven meiner ferda er så pass viktig at han dreg likevel, og han er vaksinert to gonger.

Måla med den fire dagar lange reisa er å be saman med lokalkyrkja og venda seg til alle irakarar, både sjia- og sunnimuslimar, i von om fred. Og sjølv om det ikkje står på programmet, er det òg mogleg at paven skal møta jesidiane, ein religiøs minoritet som blei overfalt av IS.