Raulandsstabbur på plass i USA

På kurset i sommar vart det lafta opp eit stabbur som var tinga bort til eksport og som skulle heilt til USA, nærare bestemt til parken Scandinnavian Heritage Association i Minot i Nord-Dakota, der Knut Skinnarlands monument av Sondre Norheim vart avduka i oktober 1987. Eit liknande monument avduka Kong Olav i Morgedal 16. januar 1988. I haust vart stabburet sendt med båt i container, men takåsar fekk ein ikkje med, for dei var for lange. Dette skulle dei ordne i Minot, men då Ottar Romtveit, Geir og Bjørn Killingtveit kom til Minot for å setje opp stabburet, mangla takåsane, så det enda med at dei måtte bruke gamle telefonstolpar. Dei tre raulendingane hadde ei triveleg veke i Minot, og arbeidet deira vekte stor oppsikt. Ein dag skjedde det ein kjedekollisjon på grunn av stabburet, fortel Ottar. Ein bil bråstoppa då sjåføren fekk sjå det fine byggverket. Dermed sa det pang-pang - og dei tre på taket fekk seg ein god lått.