Vest-Telemark-sylv gjennom 1000 år

Den største kuriositeten er utan tvil drikkehornet «Sløkjefri» frå Vistad, ein gjenstand som har vore på Universitetets Oldsaksamling i 150 år. Namnet er blitt tolka som «det som sløkker tørsten». Ein reknar at det er frå 1500-talet og det er nemnt i skriftlege kjelder alt på 1700-talet. Her er det elles både snusdåser, tvislir-stell og brurelad å sjå, ja, alt av sylv som vesttelane har omgjeve seg med gjennom århundra. Dei aller fleste av dei meir kjende bygdesylvsmedene er representera, frå Michel Mandt og Jens Erland som var aktive fyrst på 1700-talet, til Jarand Rønjom og søner og sønesøner i Åmotsdal. På 1800-talet blei det laga fine arbeid av m.a. Lars Mandt (Blikom), Skafså, Aslak Vinjerui, Vinje, og Ånund Brekke, Øyfjell, den siste var forresten Eivind Tveitens fyrste læremeister.