– Seljord er alt senteret i Vest-Telemark

– Det seier seg sjølv at Seljord er staden dersom det skal vere eit regionsenter i Vest-Telemark. Seljord er alt i praksis senter i regionen, seier ordførar John Kleivstaul. Vest-Telemarkrådet har avgjort at ein ikkje skal ha eitt regionsenter, men ein desentralisert sentrumsstruktur i dei seks kommunane. Medan ordførar Arne Vinje i Vinje kommune meiner at eit regionsenter ikkje gagnar utviklinga i Vest-Telemark, hevdar Kleivstaul at regionen må ha eit livskraftig senter med eit rikt tilbod av forretningar og kulturtilbod.

Arne Vinje peiker på at geografi er kjernepunktet for at ein i Vest-Telemark ikkje har samla seg om eitt regionsenter. Store avstandar og ynskje om å ha spreidd busetting, gjer at det er semje om ein desentralisert sentrumsstruktur i Vest-Telemark. Dette er òg i tråd med fylkesplanen. Servicefunksjonane er fordelte i heile regionen.

– Spørsmålet om eitt regionsenter har vore tema i Vest-Telemarkrådet mange gonger. Det er semje om å satse vidare på den strukturen ein har med senter i kvar kommune, seier Vinje.

Forskar Knut Vareide ved Telemarksforsking i Bø uttalte nyleg i VTB at vekst i Vest-Telemark krev eit regionsenter. Han hevda at i vår urbane tidsalder må varierte tilbod vere til stades innan handel og kultur om ein utkant som Vest-Telemark skal ha von om å halde folketalet oppe.

Mangel på bustader

– Du er altså usamd med forskaren?

– Ja, geografiske avstandar har eg alt nemnt. Men idéen om at eit område som Vest-Telemark må ha innslag av urbanitet og bymessig kultur for å overleve, er eg ikkje sikker på er rett. Me ser at det er mange som ynskjer å flytte til Vest-Telemark, men dei finn ikkje nokon stad å bu. Mangel på urbanitet kombinert med natur og eldgamal bygdekultur er attraktivt for mange, seier Arne Vinje.

Han ynskjer seg ein politikk som utnyttar dei kvalitetane Vest-Telemark har. Sjølv er han oppteken av at ein klarer å få fram det positive med den gamle bygdekulturen.

– Samspelet mellom tradisjon og modernitet er me gode på, og det må me utnytte vidare for å skape vokster i regionen. Breibandsatsinga trur eg er heilt avgjerande for å skape nye arbeidsplassar. Men det er òg andre politiske område som vil avgjere utviklinga, meiner Vinje-ordføraren.

Nasjonale føringar

– Kva tenker du på?

– Utforminga av landbrukspolitikken og distriktspolitikken saman med tilgang på kapital vil ha mykje å seie for korleis Vest-Telemark blir i framtida. I tillegg meiner eg at dersom det er turvande for å auke busettinga, må det skje ei lovendring som gjer at gardsbruk som står tomme, kan få nye eigarar, seier han.

I fylgje Arne Vinje treng ein ingen stor flyttestraum til Vest-Telemark. Men ein treng ei viss tilflytting for å auke folketalet i dei seks kommunane. Han peiker mellom anna på at tilflytting er naudsynt om ein skal makte å halde oppe den desentraliserte skulestrukturen.

Mislukka blanding

Røynslene med etablering av vekstsentra eller regionsentre som blei gjort mange stader i landet på 1960- og 70-talet, meiner Arne Vinje syner at det blei utvikla bastardar – ei blanding av by og land.

– Når Telemarksforsking dreg fram Bø som eit døme på eit vellukka regionsenter, vil eg seie at Bø har utvikla seg naturleg gjennom fleire generasjonar. Avstandane i Midt-Telemark er nesten ikkje å nemne i høve til i Vest-Telemark. Eg meiner difor at dei to regionane ikkje kan samanliknast, seier ordførar Arne Vinje.

– Regionen treng eit livskraftig senter

– Seljord er i praksis regionsenteret i Vest-Telemark. Eg meiner det er viktig å ha eit livskraftig senter med varierte tilbod i regionen, og trur at Seljord si stilling gradvis vil utvikle seg vidare, seier ordførar John Kleivstaul.

Kleivstaul seier at den offisielle politikken er at det i Vest-Telemark skal vere ein desentralisert sentrumsstruktur og ikkje eitt regionsenter. Då Vest-Telemarkrådet drøfta saka kom han i mindretal.

– Men kjem ein til at Vest-Telemark treng eitt regionsenter på lik line med dei andre regionane i Telemark, seier det seg sjølve at det blir Seljord. I dag er Seljord den mest urbane staden i Vest-Telemark og her har me også eit urbant næringsliv. Denne utviklinga vil me skal halde fram og bli utvikla vidare, fortel ordføraren.

Han er klar over at skal handelen i Seljord bløme, er det naudsynt med eit livskraftig omland for å skaffe nok handel og omsetnad. Seljord, som i dag har den høgste omsetnaden per innbyggjar i heile Telemark, er heilt avhengig av ei god utvikling i resten av Vest-Telemark.

– Eg meiner det er viktig å ha eit livskraftig senter i Vest-Telemark. Det har me i Seljord uansett om ein ynskjer å kalle det regionsenter eller ikkje, seier ordførar John Kleivstaul.