15-åring vann solistpris

I skarp konkurranse med vaksne musikarar vann nissedølen Lars Ove Borstad (15) solistprisen under mini-EM i brassband. Trombonisten busett på Fjone ser ikkje bort frå at han endar opp som musikar på heiltid.

Lars Ove Borstad har vore med i Nissedal hornmusikk i seks år. Då han for to år sidan tok med seg trombona si på sommarkurs på Kvitsund, kom nokre jenter frå Grenland og ville ha han med i ungdomsbrassbandet der.

Tri helger i halvåret tek 15-åringen turen til øvingar med Grenland ungdomsbrassband. Også Anne Dahle frå Fjone har blitt med i bandet, i tillegg til at ho spelar i Nissedal hornmusikk.

Dei to nissedølane er med i eitt av to ungdomsbrassband i heile Noreg. Bandet i Grenland har 35 høgt engasjerte og dyktige musikarar frå Telemark, Agder og Vestfold.

Prøvespel ventar

Borstad har nettopp delteke på Grenland International Brass Festival. 20 korps frå 5 nasjonar var samla i Skien til konkurransar og sosialt samvære. Etter ei flott framføring av tradjazzlåten «I remember Clifford» vann 15-åring solistprisen i 3. divisjon, ei klasse der han kjempa også mot vaksne.

– Det var uventa og eg blei veldig glad då eg vann. Og det kom stor jubel frå dei andre musikantane i bandet, fortel Borstad.

– Dette må vere noko av det største eg har vore med på, held han fram om ei tevling som blir sett på som mini-EM i brassband.

Borstad gjev seg ikkje med dette. Planen no er å prøvespele for Barratt Due, ein veldig bra skule i Oslo. Om han kjem inn der, kan ein samanlikne det med ein idrettsutøvar som kjem på landslaget. Eit ja frå skulen tyder at Borstad må ta turen til Oslo ei helg i månaden.

– Dette gjer eg for musikkens skuld og min eigen del, seier Borstad.

Byter korps

Til hausten sluttar han i Nissedal hornmusikk for å byrje i Eidanger pike- og guttekorps.

– Der får eg endå betre utvikling, og miljøet er veldig bra, veit niandeklassingen.

– Og kva skjer så vidare med musikktalentet?

– Kanskje blir eg musikar på heiltid, eg skal ikkje utelukke det, avsluttar Lars Ove Borstad.