Bruk av fond for å gå i null

Trass i at Nissedal er kommunen i Telemark som regjeringa vil gje mest i auka overføring i 2018, meiner rådmannen ein må bruke fondspengar for å kome i hamn.

Då rådmannen i Nissedal gav formannskapet hovudtrekka i budsjettet for neste år, viste oppsummeringa at ein måtte bruke 800 000 kroner av oppspart fond for å kome i balanse.

– Når me er budsjettvinnaren i Telemark i forslaget til statsbudsjett for neste år, hadde eg sett føre meg å setje av til fond, ikkje bruke fond, kommenterer ordførar Halvor Homme (Ap) overraska.

Regjeringa føreslår å auke overføringa til Nissedal med 4,6 prosent i 2018. Alle dei andre kommunane i fylket ligg på to-talet eller under i vekst, ser ein bort frå Vinje med auke på 3,7 prosent.

Barnehagestillingar

Rådmannen føreslår å sette av ein halv million kroner til tiltaksplassar – arbeidsplassar og opplæring for folk som får økonomisk sosialhjelp. Korleis ordninga blir organisert og innhaldet i ho blir avklart seinare.

Snart blir det busett flyktningar i Kyrkjebygda for fyrste gong, og då er tanken å setje av 260 000 kroner til norsklærarressurs der neste år. Vidare har rådmannen rekna med ny barnehageavdeling i denne bygda, fordi ein må utvide kapasiteten. Summen er éin million kroner og to nye årsverk. Byggjekostnader for å kunne ta imot fleire barn enn i dag kjem ein tilbake til seinare.

Tidlegare har barnehagetilbodet i kommunen vore stengt i fleire år i romjola og påskeveka, men slik er det ikkje i år. Rådmannen vil stenge tilbodet igjen desse periodane, ei innsparing til 140 000 kroner. I tillegg vil han auke makstaket i eigenbetaling for barnehageplass med 6,6 prosent til 2910 kroner månaden, noko som utgjer 110 000 kroner neste år. Eigenbetalinga i skulefritidsordninga er tenkt opp fem prosent, det same gjeld kulturskulen.

Eigenbetalinga frå lag og organisasjonar som brukar fleirbrukshuset skal bort, dermed 50 000 kroner mindre i inntekter.

Mistar millionar

I Vest-Telemark er det ei 60 prosent stilling som gjeldsrådgjevar, medan forslaget er å auke ressursen til 160 prosent. Det gjev ei årleg ekstrautgift på 68 000 kroner for Nissedal.

– Eg trur det er ei viktig stilling å prioritere, sa kommunalsjef Jarle Bruun Olsen til formannskapet.

Ein prognose viser at konsesjonskraftinntektene går ned med éin million kroner i Nissedal neste år. Vidare at eigedomsskatt i hovudsak frå dei fire største kraftverka i kommunen vil gje eit inntektstap på 1,3 millionar kroner.

På investeringsbudsjettet er det ført opp 400 000 kroner til bil for flyktningtenesta, og då slepp tilsette å bruke eigne bilar. I to aldersbustader i fyrste etasje i Smeitkollen måtte bebuarane flytte ut fordi vatnet flaut på golvet. Arbeidet som må til i bygget er rekna til 600 000 kroner.

Når formannskapet skal starte budsjettdebatten 9. november vil det truleg liggje føre opplysningar om andre investeringsprosjekt som ein må vurdere.