Byggjer opp lønsam gard

Anne Ingunn Hanserud og Hans Kristian Jørgensen har slått seg ned på Songedalstveiten i Fyresdal. Dei er i full gang med å gjere garden lønsam.

Den 7 500 dekar store garden Songedalstveiten ligg sju kilometer vestover frå fylkesvegen ved Veum i Fyresdal, og høyrer til Fjellgardane. Sidan 1970-talet har våningshuset blitt bruka som feriebustad, mellom anna av Anne Ingunn Hanserud. Ho var ei tid ein av fire eigarar av garden.

I 1912 budde tippoldemora hennar, Gunhild Songedalstveiten, på garden. 100 år seinare flytta Anne Ingunn Hanserud, Hans Kristian Jørgensen og dottera Ingrid Christine frå Aurskog i Skogn til Songedalstveiten.

– Der me budde var det 2,5 mil til butikken. Her er det bare 2 …, seier Hanserud med eit smil.

– Me visste ikkje kva me gjekk til, men me storkosar oss i ein kommune med mellom anna veldriven barnehage. Eg håpar folk i Fyresdal veit kor bra dei har det, held ho fram.

Fjellprosjekt

– Og så har me ein veldig god nabo, legg Hans Kristian til, og siktar til Per Helge Seltveit på Tortveit noko nærare fylkesvegen. Båe har no inne søknader som gjeld å satse på telemarkskua. Seltveit har drive med telemarksku i det små sidan 2008. Han og kona Siv har no åtte av denne rasen, der fem ventar kalvar.

– Me vil vere med og ta vare på rasen, seier han.

På Tortveit er det også 13 vinterfôra sauer.

Eigarane av Songedalstveiten og Tortveit fekk i fjor høvevis 150 000 og 125 000 kroner av eit fjellprosjekt til investeringar i telemarkskyr og landbruksnæringa. No ventar båe på svar frå Innovasjon Noreg om tilskot derfrå også.

Byggje om fjøset

Jørgensen har drive jordbruk før han busette seg i Fyresdal. I det gamle fjøset har han førebels to telemarkskuer, og får snart fire av rasen frå garden til Seltveit. Sist november blei det sauedrift på Songedalstveiten.

– Kor mange vinterfôra sauer har du?

– Det er stridt … Åtte, svarar Jørgensen og ler.

Planen er å byggje om heile fjøset til å kunne ha rundt 90 vinterfôra sauer. Vidare er tanken å byggje nytt fjøs til telemarkskyr.

– Men då må eg ha hjelp av Innovasjon Noreg, seier bonden.

Han er godt i gang med å byggje opp jordbruket slik at garden blir lønsam.

– Kva skal du med ein gard om du ikkje driv han, seier Jørgensen.

Han er også oppteken av at garden skal vere interessant og lønsam for dottera å overta.

På eigedomen er det gjennomført storhogst for å få kapital.

– Det kostar å restaurere eit hus med fasilitetar som før krigen, seier Jørgensen.

Medan han har fullt med arbeidsoppgåver på garden, har Hanserud 80 prosent stilling som lærar på skulen i Fyresdal.

– Det er så mykje å ta vare på her på Songedalstveiten at ein må bu her. Så fort eg såg det var noko ledig jobb i Fyresdal, søkte eg. Eg fekk stilling som lærar, seier ho nøgd.

– Hadde me ikkje flytta hit, hadde dette framleis vore ei jakthytte, avsluttar Hanserud.