Den store rulleskihelga
Både laurdag og sundag var det god deltaking i Fyresdal-konkurransar der sko var bytta ut med rulleski.
Laurdag var 31 rulleskiløparar frå 17 år og oppover med på Sparsprinten Åslandsbakkane opp. Løpet starta i Fyresdal sentrum og var på 11 kilometer med mål oppe i Åslandsgrend. Vidare var 27 gutar og jenter frå 11 16 år med på rulleskirenn, anten éin, to eller tre kilometer langt. Her var det med deltakarar frå alle kommunane i Vest-Telemark.
Sundag var nesten 60 deltakarar med på rulleskiskyting i anlegget på Veum.
Artikkelen held fram under annonsen.
– Me har fått mange positive tilbakemeldingar på arrangementet, og det var moro at det blei med så mange frå 17 år og oppover båe dagane, seier Tor Helge Midtbø i arrangøren Fyresdal skiskyttarlag.
På 11-kilometeren laurdag ettermiddag hadde politiet gjeve klarsignal for at ein kunne stoppe trafikken på fylkesvegen medan løparane var der.
– På det meste kan nokon bilar ha venta i 20 minuttar. Eg trur me stort sett møtte forståing for stenginga, seier Midtbø.
