Dyrskun er betre enn Cancun

Det meiner i alle fall Terje Riis-Johansen. Knut Buen er truleg samd.

Dyrsku’n har dei seiste åra lokka nærare 80 000 landbruksentusiastar til Seljord kvar haust. Det er nesten ei tredvedobling av innbyggjartalet i bygda. Dagleg leiar Geir Helge Espedalen trur likevel arrangementet har mykje og gå på.

– Innan fem år skal Dyrsku’n vere på heile nasjonens lepper og me skal klare å bli like store i Noreg som merkevara Coca-Cola er på verdsbasis, var visjonen Espedalen kom med på Bjørgenuten.

Han hadde lokka med seg pressa på helikoptertur opp på den lokale fjelltoppen for å informere om storsatsinga. Der vart det servert heimelaga rjomegraut med tilhøyrande spekemat, akkompagnert av felespelet til Knut Buen. I tillegg til dette var fylkesordførar og tidlegare landbruks- og matminister Terje Riis-Johansen til stades, som fortalte om sitt forhold til arrangementet.

– Eg har vore på Dyrsku’n nesten kvart år i over 40 år, og det var ein av få ting eg fekk lov til å ta meg fri frå skulen for. Det er ei sjølvfølgje å vere her så sant eg har anledning. I 2003 kolliderte Dyrsku’n med forhandlingane av den internasjonale landbruksavtala i Cancun (som ligg i Mexico, journ. merk.). Cancun er kjend for å ha blant verdas finaste strender, men likevel lengta eg til Seljord og Dyrsku’n, fortalde fylkesordføraren.

Matsatsing og rekruttering

Dyrsku’n har lenge vore ein arena for lokalmat, men også der skal det i åra framover satsast tyngre i følgje leiinga. Dei har sikra seg rettigheitene til merkevareneMat fra Telemark ogMat frå Telemark, og vil samle dei om lag 60 småskalaprodusentane i fylket inn under denne.

I tillegg har dei opna eit såkalla «pop-up» kjøkken, som vil seie ein frittståande restaurant, der dei vil selje lokalprodusert mat, laga av innleigde kokkar frå restaurantar i Oslo.

Forutan matsatsinga vil det også bli satsa meir på rekruttering av yngre aktørar til å involvere seg i landbruksutstillingane.

– Må bli flinkare til å formidle tilboda

Espedalen uttalte at ei av dei største utfordringane Dyrsku’n står over for er å formidle dei ulike tilboda til publikum, slik at endå fleire blir lokka til å komme.

– Eg har sjølv vore på Dyrsku’n i 42 år, men eg ante ikkje kor mykje som blir tilbode her før eg gjorde meg kjend med programmet. Me må bli flinkare til å opplyse folk om dei ulike tilboda, som for eksempel Bornas Dyrsku, slik at publikum skjønar at det er tilbod som passar alle aldersgrupper her, fortalde Espedalen.

– Bornas Dyrsku er ei eiga satsing på dei yngste, slik at også dei skal ha rikeleg med aktivitetstilbod i løpet av helga. I tillegg til det tradisjonelle tivoliet vil det bli moglegheiter for å stå på rullebrett, hesteriding, diverse andre friluftsaktivitetar og mykje ana, utdjupa sal- og marknadsleiar Yvonne Eilevstjønn.

For å markere opninga på årets Dyrsku vil det bli tale ved mat- og landbruksminister Sylvi Listhaug (FrP) med ein påfølgjande debatt der fleire politikarar og andre aktørar deltek, i tillegg til Listhaug.