Etterlyser vegnamn og husnummer

Manglande vegmerking og husnummerering i vestfylket skapar vanskar både for ambulanseteneste og politi. Nokre kommunar er i gang, medan andre ikkje har byrja arbeidet. Truleg vil det gå fleire år før namninga er fullført.

Ringjer ein naudnummera til brann, politi eller ambulanse kjem ein til ein alarmsentral i Skien. Oppgåva deira er så å kalle ut beredskapen til staden der sjukoms- eller ulykkestilfellet er.

– Det som reddar oss er lokalkunnskapen. Ambulansepersonell som ikkje er lokalkjende er avhengige av å køyre saman med ein lokalkjend når dei er ute på oppdrag. Men ikkje alltid greier dei lokalkjende heller å fylgje med på nytilflytte, seier Geir Venås i Seljord og Kviteseid Ambulanse. Han etterlyser vegnamn og husnummer i Vest-Telemark-kommunane, både fysisk skilting og i kartverksystemet.

Seljord og Kviteseid Ambulanse har også oppdrag i andre kommunar.

– Erfaringa frå Bø, til dømes, der dei fleste har vegadresser, er at det er mykje enklare å finne fram, seier han.

– Eit stort sakn hjå politiet

Også hjå politiet er manglande vegnamn og nummer eit stort sakn. Ikkje alle vakthavande politifolk er like lokalkjende.

– Vegnamn og husnummer er eit veldig sakn. For Operasjonssentralen i Telemark politidistrikt, dit dei fleste som ringjer politi- eller lensmannsetaten i fylket kjem, skapar manglande adresser vanskar. Då Operasjonssentralen kom i drift, trudde dei nesten ikkje det var sant at så mange kommunar mangla adresser, fortel lensmann i Seljord, Torodd Aase.

Han legg til at politiet aldri har stressa kommunane med dette, men uttrykkjer likevel at det mange gonger hadde vore trong for meir eksakte adresser.

– Det går an å finne fram på kart dersom gards- og bruksnummer blir oppgjeve. Men ikkje mange veit kva gards- og bruksnummer dei bur på, poengterer lensmannen.

Installerer digitale kart

Ambulansetenestene i Telemark er no i ferd med å installere digitale kart i alle bilane, såkalla GPS (Global Position System).

– På karta ser ein kvar ambulansane er til kvar tid, og kan dirigere dei til skadestaden. Men karta for det meste av Vest-Telemark er heilt utan vegnamn. Dermed har hjelpemiddelet inga nytte, få har kjennskap til gards- og bruksnummera, seier Venås.

Han etterlyser både fullstendige kart og skilting av vegar og hus.

– Ein del stader har vegar fått namn og blitt merka. Men det hjelper ikkje med fine skilt dersom dei ikkje er inne på kartverket, understrekar ambulansesjåføren.

Ikkje ajourført i Kviteseid

Av dei seks Vest-Telemark-kommunane er det berre Kviteseid som har innført vegnamn og adresser for heile kommunen, eit arbeid som vart ferdig for ein del år sidan. Men i fylgje Jorunn Finkenhagen ved teknisk etat i kommunen er ikkje registeret skikkeleg ajourført.

– Me har dessverre eit stort etterslep når det gjeld oppdateringa av adressene. Heller ikkje er det sett opp skilt over alt, seier ho.

Når det gjeld å kartfeste vegnamna opplyser avdelingsingeniør Rikard Berge at vegnamna er inne på det kommunale kartverket, også digitalt.

Blankt i Nissedal og Fyresdal

To kommunar i vestfylket er heilt utan vegnamn; Nissedal og Fyresdal. Oppmålingsingeniør i Nissedal kommune, Knut Matre, fortel at arbeidet ikkje er prioritert politisk enno.

– Arbeidet må truleg i gang, men det er ein lang prosess som sikkert vil ta nokre år, seier han.

Heller ikkje Fyresdal har førebels konkrete planar om å innføre vegnamn.

– Men det kjem til å bli meir og meir aktuelt – særleg med tanke på utrykkingskøyretøy, seier avdelingsingeniør Hallgeir Lund.

Innført på Dalen og i Åmot

I Vinje kommune er det, i fylgje ingeniør Magne Kaasa, offisielle adresser berre i Åmot. Der er vegane merka og han fortel at det vil bli laga nummerskilt som blir sende ut til huseigarane.

– Hittil er det ikkje gjort vedtak om å tildele offisielle adresser andre stader i kommunen, opplyser han.

I fylgje avdelingsingeniør i Tokke kommune, Ådne A. Naper, er det innført vegnamn på Dalen og i delar av Høydalsmo. Men vegane er enno ikkje ferdig merka. Det vil skje i løpet av nokre år, fortel han.

Men skilting av hus tek ikkje kommunen seg av.

– Det blir opp til huseigaren å setje opp, seier avdelingsingeniøren.

Seljord statar i år

I Seljord er ein del vegar i sentrum og i byggjefelta i Seljord og Flatdal døypte.

– Men namninga er langtfrå komplett. Heller ikkje er det gjort noko med husnummerering, seier teknisk sjef Kåre Groven.

Han opplyser vidare at arbeidet skal i gang i år.

– Meininga er å få namna alle vegar i kommunen. Det skal setjast ned ei gruppe som gjer framlegg om namn, før saka skal til politisk behandling, forklarar han.

Likeeins i andre distriktskommunar

Eit par telefonar til bygder i andre dalføre i landet viser at Vest-Telemark ikkje er åleine om å mangle adresser. I Nord-Aurdal kommune i Valdres er det til dømes berre sentrum og byggjefelta i Fagernes som har vegnamn. I Ål kommune i Hallingdal blir det opplyst at alle vegar i kommunen, inkludert ein del av hyttefelta har namn, men berre sentrumsområda av Ål har husnummerering.