Færre kommunekroner enn venta

Kommunanes Sentralforbund er skuffa over at statsbudsjettet til regjeringa ikkje inneheld like mykje pengar til kommunane som førespegla i vår. Men regjeringa lovar å kompensere auka arbeidsgjevaravgift, i alle fall for kommunane og fylka. Elles kan forslag om endring av kraftskatten redusere inntektene til kraftkommunane. Vest-Telemark Museum er budsjettvinnaren, og ligg an til å få dobla statsstøtta neste år.

Frå nyttår får Noreg ikkje lenger lov til å ha differensiert arbeidsgjevaravgift. Det betyr auka avgifter for mange kommunar og næringsverksemder. I framlegg til statsbudsjett lovar regjeringa at dei auka avgiftsinntektene som kjem inn, alle skal bli ført tilbake til kommunane og fylka.

– Det er positivt. Men for næringslivet ligg det ein del problem framover. Regjeringa lovar tiltak gjennom ulike ordningar for næringslivet. Men det står att å sjå, seier Vinje-ordførar Børre Rønningen, leiar i aksjonskomitéen for differensiert arbeidsgjevaravgift.

Han gjev ikkje opp kampen om å få utsett iverksettinga av nyordninga til 1. januar 2005.

Kraftkommunar under press

Regjeringa føreslår endringar i skattlegginga av kraftverk. Den er ikkje heilt god å svelgje for Rønningen.

– Endringa kan bety bortfall av over 100 millionar kroner for kraftkommunane. Det er skummelt for kommunane i Vest-Telemark, Tinn og Hjartdal, dei åtte kommunane som er med i fellesfondet, meiner Vinje-ordføraren.

KS synest lite om at regjeringa føreslår ein vekst i inntektene til kommunane som er 1,75 milliardar kroner mindre enn det stortinget vedtok i vårens kommuneproposisjon. Regjeringa meiner eit stramt kommuneopplegg vil vere ein fordel for kommunane, då det vil vere med på og dempe pris- og lønsveksten.

– Rammene må aukast to prosent meir enn det regjeringa vil. I tillegg må det på plass ein plan som bringer balansen tilbake i kommuneøkonomien i løpet av dei næraste åra, seier Halvdan Skard, styreleiar i KS.

Han er svært lite nøgd med at regjeringa Bondevik fører kommunane inn i det sjuande magre året på rad. Konsekvensen er at mange køyrer mot underskot.

Litt auke til vegvedlikehald

I statsbudsjettet har Statens vegvesen Region Sør fått ei ramme på totalt 1.730 millionar kroner til investeringar. Det tyder at fylka Buskerud, Vestfold, Telemark, Aust-Agder og Vest-Agder kan kjempe om 350 millionar kroner meir enn i år. Ingen av investeringane er plassert i Vest-Telemark.

På landsbasis er midlane til vedlikehald av vegar auka med 120 millionar kroner, pengar som er øyremerka asfalt. Vegdirektoratet fordeler potten.

– Budsjettet er stramt, men gjer det mogleg å oppretthalde nivået innan drift og vedlikehald i forhold til i 2003, seier regionvegsjef Andreas Setsaa i Region sør.

Midlar til kalking blei likevel ikkje redusert i revidert nasjonalbudsjett i vår, etter at opposisjonspartia hadde sagt sitt. Regjeringa går på ny til angrep på kalkingspotten i statsbudsjettet som blei lagt fram i går, og føreslår å redusere potten frå 98 til 83 millionar kroner.

– Nok ein gong vil regjeringa redusere innsatsen mot sur nedbør, sjølv om stortinget kvart år instruerer om å auke løyvinga. Blir kutt på 15 millionar kroner ein realitet, vil vatn igjen bli sure og fisk døy, åtvarar Norges Jeger- og Fiskerforbund.

Vest-Telemark Museum budsjettvinnar

– Dette er ei stor glede, seier Dag Rorgemoen, ein strålande nøgd konservator ved Vest-Telemark konsoliderte museum. I framlegget til statsbudsjett får museet meir enn dobla statstilskotet.

– Me har fått tilbakemelding om at arbeidet me er i gang med er rett, slår Rorgemoen fast. I år er tilskotet på 937.000 kroner, neste år aukar det med 1 million.

Vest-Telemark Museum er eitt av ti museum i heile landet som får auka statstilskot neste år.

Honnør til kommunane

– Det er grunn til å rette ein stor honnør til kommunane i Vest-Telemark, som har vore med i prosessen for å få til det konsoliderte museet. Kommunane har gjort avtaler om tilskot, noko som gjer tilskota synlege, og dermed ser ein at det er grunn for staten å gå inn med meir midlar, seier Rorgemoen. Han opplyser at målsetjinga for musea er ei deling med 40 prosent lokal finansiering og 60 prosent frå staten.

– Ein ser no at innsatsen har gjeve resultat, seier Rorgemoen.

Telemark peikar seg ut

I grunngjevinga for å auke tilskotet til Vest-Telemark Museum seier Kultur- og kyrkjedepartementet mellom anna:

– Når ein vurderer utviklinga av ein samla og avklart struktur i dei enkelte fylka, er det særleg Telemark og Nordland som peikar seg ut med omsyn til innhald og framdrift i konsolideringsarbeidet det siste året. Det blir derfor føreslege å auke tilskotet til tre konsoliderte institusjonar i kvart av desse to fylka.

I Telemark får Telemark Museum, Vest-Telemark Museum og Norsk Industriarbeidermuseum auka tilskota sine.

– Dette er eit steg på vegen. Men det er att eit godt stykke før me er på det nivået me skal vera, seier Dag Rorgemoen.