Fjerna Kvitsund frå null-stønadslista

Sigvald Oppebøen Hansen (Ap) reagerte sterkt på partikollega Trond Giske sitt utspel om at Kvitsund sto på ei liste over skular som skulle miste statsstønaden. – Nå er Kvitsund fjerna frå lista, forsikrar fyrstekandidaten.

Det var under ein debatt på NRK , dagsnytt 18, i førre veke Trond Giske la fram ei liste over friskular i Noreg som vil miste statsstønaden om Ap får makta etter valet. Dette utspelet kom med bakgrunn i at Giske meiner skular som mellom anna driv for bilbeltru undervisning ikkje burde få stønaden. Kvitsund gymnas i Kviteseid var ein av skulane som var på denne lista.

KrF sin fyrstekandidat i Telemark, Bror Yngve Rahm, undra på om Ap sin fyrstekandidat i Telemark, Sigvald Oppebøen Hansen, stilte seg bak dette utspelet frå Giske, spesielt med tanke på Kvitsund gymnas.

– Då eg fekk høyre dette tok eg kontakt med rådgjevaren til Giske og tok initiativ til å fjerne Kvitsund frå lista. Giske hadde laga denne lista ut frå innspel han hadde fått frå heile landet. Og det er vel få i Ap sentralt som kjenner Vest-Telemark så godt som meg, så eg trur Giske la seg ganske flat og fjerna Kvitsund frå lista, fortel Arbeidarpartiets fyrstekandidat i Telemark, Sigvald Oppebøen Hansen.

Tar det for gitt

Fyrstekandidaten fortel at han sjølv har vore elev ved skulen i Kviteseid og at han tar det for gitt at skulen fylgjer læreplanen.

– Eg oppfattar Kvitsund som ein god skule, eg kjenner også mange som har vore elevar der og har aldri høyrd at dei driv i strid med læreplanen.

Oppebøen Hansen legg også vekt på at han hadde eit godt samarbeid med Kvitsund då han var fylkespolitikar ved å ha god dialog med skulen og jobba for at dei skulle få tilskot frå fylkeskommunen.

– Det er også viktig å påpeike at Ap ikkje er mot relegiøse- eller alternative skular. Det er dei kommersielle skulane me reagerer på, seier Oppebøen Hansen.