Folketalet aukar i Vest-Telemark

Den negative folketalsutvikla i Vest-Telemark snudde i 2008. Samla vart det tri fleire vesttelar i høve til året før. Nissedal og Vinje er dei store vinnarane med høvesvis 15 og 27 fleire innbyggjarar. Kviteseid fekk ein nedgang i folketalet på 17 i fjor.

Forskar Audun Thorstensen ved Telemarksforsking seier at folktalsutviklinga i Vest-Telemark vart betre enn venta for 2008. Dei endelege tala viser at det er 18 fleire personar enn prognosane Statistisk Sentralbyrå (SSB) la fram i desember i fjor.

– Folketalsutviklinga i Vest-Telemark syner positive tendensar, men veksten er marginal. Tendensen er framleis negativ, og syner stagnasjon i høve utviklinga i meir urbane område av landet. Elles ser ein at distrikta på landsbasis har hatt ei betre folketalsutvikling dei seinare åra. Vest-Telemarkregionen har ikkje hatt denne positive auken i folketalet, fortel Thorstensen.

Når forskaren går bak tala ser han at det er innvandring som gjev fleire innbyggjarar i kommunane. Den innanlandske flyttebalansen er negativ også i 2008.

Thorstensen peiker også på at folketalsutviklinga i Telemark er låg med ein auke på berre 0,5 prosent. Han meiner det burde minst vore på landsmiddelet som i fjor vart 1,3 prosent. Det er berre fire fylke som har ei svakare utvikling i folketalet enn Telemark. Flest nye innbyggjarar i 2008 fekk Oslo, Akershus, Rogaland og Hordaland.

Vinje fekk 27 fleire innbyggjarar i fjor. Ordførar Arne Vinje seier tala er gledelege og inspirerande. Han meiner det er vanskeleg å peike på einskildområde for å forklare veksten, men peiker på at kommunen har gode tenestetilbod til innbyggjarane.

– Dei seinare åra har me opplevd eit visst press på barnehagekapasiteten og det har vore mangel på bustadhus. Kan hende snur ei årelang trend, slik at folketalet aukar, seier Vinje-ordføraren.

Nissedal auka med 15 personar i fjor. Det er ein prosentvis auke på 1,1 prosent, og gjev kommunen 2. plass på statistikken etter Bø som har størst auke i folketalet av kommunane i Telemark.

Fyresdal hamna også på plussida med 4 fleire innbyggjarar.

Kviteseid mista 17 innbyggjarar i fjor, Seljord mista 5 og Tokke 3.