Komande Seljord-rådmann søkjer toppstillinga i Tinn

I desember byrjar Finn-Arild Bystrøm i jobben som rådmann i Seljord etter Per Dehli. Han er for tida kommunalsjef i heimkommunen Tinn. I søkjarlista til den ledige rådmannjobben i Tinn er Bystrøm eitt av elleve namn, skriv Rjukan arbeiderblad. Søkjarlista blei lagt fram for tilsettingsutvalet måndag. Tinn kommune har engasjert rekrutteringsselskapet Headvisor i arbeidet. Firmaet skal utarbeide ei innstilling, men det er kommunestyret som tek den endelege avgjerda om kven som blir ny rådmann, skriv lokalavisa.

Tinn-rådmann Rune Lødøen går av med pensjon til nyttår. Bystrøm ville ikkje kommentere om det var aktuelt å søkje på jobben då VTB spurde om det i august.

– Eg har gjort ei avtale med Seljord kommune som eg forheld meg til, sa Bystrøm då.

Då VTB snakka med Bystrøm torsdag sa han at han ser fram til å starte som rådmann i Seljord fredag 1. desember, og at det ikkje har noko med Seljord å gjere at han også søkjer ny jobb i Tinn.

– Når høvet til å søkje på stillinga som rådmann på heimstaden dukka opp, måtte eg prøve. Det er elleve gode kandidatar på søkjarlista, og eg belagar meg på å starte i den nye jobben i Seljord. Eg vil starte med liv og lyst, og har alt mange planar og tankar om korleis me kan utvikle Seljord vidare, seier Bystrøm.

– Vil det bli avgjort kven som blir ny rådmann i kommunestyremøtet i Tinn 16. november?

– Det håpar eg for alle partar, men eg kjenner ikkje til prosessen, svarar Bystrøm.

Gry Åsne Aksvik, planog økonomisjef i Vinje kommune, har også søkt på jobben. Dei andre søkjarane er: Thorbjørn Gaarder (62), Chief Credit officer, Oslo, Håkon Sandby (59), eiga verksemd, Akershus, Jan Anders Dam-Nielsen (41), direktør, Telemark, Toril Dale (51), leiar, Innovasjon Telemark, Anne Mette Gangsøy (50), leiar, Telemark, Kjetil Skjeie (54), rådmann, Nordland, Anne Erdal (53), kommunalsjef økonomi, Hordaland, Knut Owing (59), jobbsøkjar, Vest-Agder, Hans Petter Karlsen (57), konsulent, Østfold.