Omsette for 160 millionar på senteret

Aldri før har fleire vore innom, og aldri har det blitt omsett for meir på Telesenteret enn i 2017.

Dag Christiansen er tilbake på Telesenteret etter fem år. Mannen som var senterleiar i nesten ti år har tatt på seg rolla att når Linda Barth Skau er i permisjon. Christiansen er no leiar for Hovenga-senteret, Ulefoss-senteret, Gulset-senteret og PP-senteret, i tillegg til Telesenteret, i eitt år, og han kan gle seg over å kome tilbake til eit senter som har utvikla seg mykje sidan Søndre Viken eiendomspartner AS overtok senteret i 2004.

– Dette er no det mest moderne senteret av dei fem, fastslår Christiansen.

Meir og fleire

Ikkje nok med det. Telesenteret er no nummer to-senteret i omsetning, berre Hovenga har høgare omsetning. I 2017 blei det på Telesenteret omsett for 160 millionar kroner, det er 17 millionar meir enn året før. Totalt var 446 000 kundar innom Telesenteret i 2017, ein auke på 4,9 prosent samanlikna med året før. Christiansen trekkjer fram apoteket, som kom i fjor vår, som ein av nyklane for den gode auken.

– Apoteket er også den siste brikka, meiner Christiansen om miksen av dei 12 butikkane i senteret.

Han seier det framleis er eit stort potensial å hente frå turisme, men seier senteret har gode besøkstal både frå Vest-Telemark, men også frå Bø i samband med kampanjar.

– Det har hjelpt at polet og Meny har utvida opningstidene, seier han.

Satsa på senteret

Tilbake i 2013: Telesenteret hadde lege ute for sal då eigarane avblåste prosessen. I staden blei det satsa. Det blei investert i tak, ventilasjon og fasade.

– Berre det å seinke taket gjorde jo senteret «nytt». Tidlegare fyra me for kråkene, seier Christiansen med eit smil.

Han håpar på å skape endå meir aktivitet på senteret i 2018, og er ikkje redd for konkurransen når Rema 1000 etter planen flyttar ned mot E134.

– Korleis er det å vera tilbake etter fem år?

– Det er kjempemoro. Det er jo stort sett dei same folka her, seier han.