Oppblåsbare dokker og Vesaas på tullespansk

Revygruppa i Haukeli hadde som vanleg tatt for seg eit breitt spekter av lokale hendingar, fenomen og ikkje minst personar i utarbeidinga av årets program – alt sjølvsagt sett på spissen slik berre dei kan.

Ordførar Arne Vinje, Odd Nordstoga og Bjørn Arne Lindskog var tri av dei profilerte vinbyggjane som måtte finne seg i å bli parodiert av galningane i revygruppa i årets Haukelirevy. Jamvel rådmann Lehmann fekk ein gjesteopptreden som ei av dei vonde åndene i Vinje, under eit innslag der ein klarsynt skulle diagnostisere problema i kommunen.

Facebookharselas

Svineinfluensa, skuterkonflikt, OL i Haukeli og ein svært byråkratisk legesekretær var nokre tema som blei tekne opp og sett i eit lokalt ljos av dei etterkvart så erfarne amatørane.

Mange i salen burde nok særleg kjenne seg att i den vanvittige folkeopplysningstrongen som nettfenomenet facebook har ført med seg. Hans Nesheim og Jan Halvor Romtveit illustrerte dette svært godt gjennom ein middagssketsj der Nesheim som mannen i huset blei så oppkava over at kjerringa (Romtveit) hadde kosta på seg fløte i sausen, at han gløymde å ete og i staden kasta seg over datamaskina for å kringkaste denne ekstravagansen.

Vesaas-humor hadde òg fått plass på programmet. Revygruppa kom alle i forkjøpet og oversette heile Fuglane til ein slags spansk sjølv far kan forstå. For ein treng vel ikkje vere vidare språkmektig for å skjøne den kvasispanske setninga «Los jegros skytos los fuglos».

God respons på annonse

Og for dei av VTB-lesarane som undra seg over ei noko annleis rubrikkannonse ei tid tilbake, der det blei avertert etter ei rein, heil oppblåsbar dokke, kan me no avsløre at mannen bak var Tarjei Sørvesaas, som ynskte seg ein skiturkamerat med meir. Det fann han, og «Berta» var med nesten kvar gong Tarjei tusla over scena innimellom innslaga og rydda kulisser medan han lirte av seg vittige kommentarar.

Rungande latterbrøl og kontinuerleg fnising blant publikum vitna om at revyen slo an i år òg. Etter siste førestilling laurdag var det heile over for denne gong. No kan dei profilerte vinbyggjane som enno ikkje har vore i revygruppas søkelys starte å gruglede seg til neste år. Turen kjem nok til dykk, òg.